കോട്ടയം: ചുട്ടുപൊള്ളുന്ന വെയിലില് ഓടിത്തളര്ന്ന് ഓണ്ലൈന് ഭക്ഷണ വിതരണക്കാര്. മറ്റ് തൊഴില് മേഖലകളില് തൊഴില്സമയ പുനഃക്രമീകരണമുണ്ടെങ്കിലും ഇവര് കത്തുന്ന ചൂടിലും വേഗം ഒട്ടും കുറയാതെ കുതിക്കുകയാണ്. ഭക്ഷണ വിതരണം, ക്വിക്ക് കൊമേഴ്സ്, ഇ -കൊമേഴ്സ് പ്ലാറ്റ്ഫോമുകളിലായി ആയിരക്കണക്കിന് വിതരണ തൊഴിലാളികളാണ് ജില്ലയില് വിവിധ സ്ഥലങ്ങളിലായി ജോലി ചെയ്യുന്നത്.
ഓണ്ലൈന് വിതരണ തൊഴിലാളികള്ക്ക് സംഭരണ കേന്ദ്രങ്ങളിലും ഭക്ഷണവിതരണക്കാര്ക്ക് റെസ്റ്ററന്റുകളുടെ സമീപത്തും തണലോടുകൂടിയ വിശ്രമസൗകര്യം ഒരുക്കണമെന്ന് ജില്ലാ കളക്ടറുടെ നിര്ദേശമുണ്ടെങ്കിലും ഒരിടത്തു പോലും പാലിക്കപ്പെടുന്നില്ല. ഓര്ഡര് ലഭിച്ച ഭക്ഷണത്തിനായി ഹോട്ടലുകള്ക്ക് വെളിയില് വെയിലത്ത് വിതരണക്കാര് കാത്തു നില്ക്കുകയാണ് പതിവ്.
അസഹ്യമായ ചൂടിലും ജോലി ചെയ്യേണ്ടിവരുന്നവര്ക്ക് ഈ സമയം കൂടുതല് വേതനവും പൊള്ളലേല്ക്കാതിരിക്കാന് സുരക്ഷ നല്കുന്ന മേല്വസ്ത്രങ്ങളും നല്കണമെന്ന് വിവിധ കമ്പനികളോട് തൊഴിലാളികള് ആവശ്യപ്പെട്ടിട്ടുണ്ടെങ്കിലും പരിഗണിക്കപ്പെട്ടില്ല.
അതിവേഗം ഉത്പന്നങ്ങള് കസ്റ്റമര്ക്ക് എത്തിച്ചുനല്കേണ്ട സ്ഥാപനങ്ങള്ക്കുവേണ്ടി ഓടുന്നവര് കടുത്ത മാനസിക സമ്മര്ദമാണ് അനുഭവിക്കുന്നത്. കൃത്യസമയത്തിന് ഉത്പന്നങ്ങള് എത്തിച്ചില്ലെങ്കില് പ്രതിഫലത്തെയും റേറ്റിംഗിനെയും ബാധിക്കും.
പാചകവാതകക്ഷാമം കാരണം പല ഹോട്ടലുകളും അടച്ചതിനാല് ഓണ്ലൈന് ഡെലിവറിയെ ആശ്രയിക്കുന്നവരുടെ എണ്ണം വലിയ തോതില് വര്ധിച്ചു. ജില്ലയിലെ വിവിധ നഗരങ്ങളില് കൊടുംചൂടിലും തിരക്കിലും ലക്ഷ്യസ്ഥാനത്തേക്ക് കുതിക്കുകയാണിവര്.
