കൊടുംചൂടിൽ ദാഹിച്ചുവലഞ്ഞ കുരങ്ങന് കുടിവെള്ളം നൽകി മാതൃകയായ ട്രാഫിക് പോലീസുകാരന്റെ വീഡിയോ സോഷ്യൽ മീഡിയയിൽ തരംഗമാകുന്നു. പല വാർത്തകളിലും ഇത് ഉത്തരാഖണ്ഡിൽ നിന്നുള്ള ദൃശ്യമായി തെറ്റായി പ്രചരിക്കുന്നുണ്ടെങ്കിലും, യഥാർഥത്തിൽ ഈ സംഭവം നടന്നത് മഹാരാഷ്ട്രയിലെ മാൽഷെജ് ഘട്ടിലാണ്.
മഹാരാഷ്ട്ര ട്രാഫിക് പോലീസ് കോൺസ്റ്റബിളായ സഞ്ജയ് ഘൂഡെ ആണ് ഈ കാരുണ്യപ്രവൃത്തിയിലൂടെ ജനഹൃദയങ്ങൾ കീഴടക്കിയത്.കടുത്ത വേനൽച്ചൂടിൽ നിർജ്ജലീകരണം സംഭവിച്ച് അവശനായ ഒരു കുരങ്ങന് അദ്ദേഹം തന്റെ കയ്യിലെ കുപ്പിയിൽ നിന്നും വളരെ സ്നേഹത്തോടെ വെള്ളം കുടിപ്പിച്ചു. ഐഎഫ്എസ് ഓഫീസറായ സുശാന്ത് നന്ദ ഈ ഹൃദ്യമായ വീഡിയോ ട്വിറ്ററിലൂടെ പങ്കുവെച്ചതോടെയാണ് ഇത് ആഗോളതലത്തിൽ ശ്രദ്ധനേടിയത്.
വനമേഖലകളിൽ നിന്നും ജനവാസ മേഖലകളിലേക്ക് വെള്ളം തെരഞ്ഞെത്തുന്ന മൃഗങ്ങൾക്കായി താനും തന്റെ ടീമും എന്നും അധികമായി കുടിവെള്ള കുപ്പികൾ കരുതാറുണ്ടെന്ന് സഞ്ജയ് ഘൂഡെ വ്യക്തമാക്കി. സാധിക്കുന്നിടത്തെല്ലാം ദയ ഉള്ളവരാകുക” എന്ന അടിക്കുറപ്പോടെ പങ്കുവെച്ച വീഡിയോ 52,000ത്തോളം പേരാണ് ഇതിനോടകം കണ്ട് കഴിഞ്ഞത്. സഞ്ജയ് ഗൂഡിനെ അഭിനന്ദിച്ച് നിരവധിയാളുകൾ രംഗത്തെത്തിയിട്ടുണ്ട്. വീഡിയോ കണ്ടപ്പോൾ കണ്ണ് നിറഞ്ഞ് പോയെന്നും ഇത്തരം സഹജീവി സ്നേഹമുള്ളവർ നമുക്കം ചുറ്റും ഉണ്ടല്ലോയെന്നുമാണ് പലരും കമന്റ് ചെയ്യുന്നത്.
പോലീസുകാരൻ വെള്ളക്കുപ്പിയുമായി കുരങ്ങിന് അടുത്തേക്ക് എത്തുന്നതും കുരങ്ങൻ രണ്ട് കൈകളും കൊണ്ട് കുപ്പി പിടിച്ച് വെള്ളം കുടിക്കുന്നതുമാണ് വീഡിയോയിൽ കാണാൻ കഴിയുന്നത്. പോലീസുകാരന് സമീപത്തായി നിരവധി യാത്രക്കാർ നിൽക്കുന്നതും വീഡിയോയിൽ കാണാം.
