മുംബൈ സെൻട്രൽ ലൈനിൽ തിരക്കേറിയ ലോക്കൽ ട്രെയിനിൽ നിന്ന് യുവതി പുറത്തേക്ക് വീണു. വ്യാഴാഴ്ച രാവിലെ ദൊംബിവ്ലി – കൽവ സ്റ്റേഷനുകൾക്കിടയിലാണ് സംഭവം. ഡോറിനടുത്ത് നിൽക്കുകയായിരുന്ന യുവതി ട്രെയിനിലെ കടുത്ത തിരക്കിനെത്തുടർന്ന് പിടിവിട്ട് താഴേക്ക് വീഴുകയായിരുന്നു.
യുവതി അത്ഭുതകരമായി വൻ ദുരന്തത്തിൽ നിന്ന് രക്ഷപ്പെട്ടെങ്കിലും അപകടത്തെത്തുടർന്ന് ട്രെയിൻ ഏറെനേരം ട്രാക്കിൽ നിർത്തിയിട്ടു. ഇതോടെ ട്രെയിനകത്തെ ശ്വാസം മുട്ടിക്കുന്ന തിരക്കിൽ തുടരുന്നതിനേക്കാൾ സുരക്ഷിതം ട്രാക്കിലൂടെ നടക്കുന്നതാണെന്ന് കരുതി നിരവധി വനിതാ യാത്രക്കാർ ട്രെയിനിൽ നിന്ന് ഇറങ്ങി ട്രാക്കിലൂടെ അടുത്ത സ്റ്റേഷനിലേക്ക് നടന്നു.
തിരക്കേറിയ രാവിലത്തെ സമയങ്ങളിൽ മുംബൈ സെൻട്രൽ ലൈനിലെ യാത്രക്കാർ നേരിടുന്ന കടുത്ത സുരക്ഷാ ഭീഷണിയും ദുരിതവുമാണ് ഈ സംഭവം വീണ്ടും വെളിപ്പെടുത്തുന്നത്. യാത്രക്കാരുടെ എണ്ണം കൂടുമ്പോഴും ആവശ്യമായ സുരക്ഷാ മുൻകരുതലുകൾ ലോക്കൽ ട്രെയിനുകളിൽ സ്വീകരിക്കുന്നില്ലെന്ന വിമർശനം ഇതോടെ ശക്തമായിട്ടുണ്ട്.
