എയർ ഇന്ത്യ വിമാനത്തിലെ ഒരു യാത്രക്കാരന് ഇക്കൊല്ലം തന്റെ രക്ഷാബന്ധൻ ആഘോഷം പതിവിലും വ്യത്യസ്തമായി മാറി. ഓഗസ്റ്റ് 28ന് വിമാനയാത്രക്കിടെ എഴുത്തുകാരനായ സുധാൻഷു കൗശിക്കിനാണ് അപ്രതീക്ഷിതമായി ‘സഹോദര പദവി’ ലഭിച്ചത്. 30,000 അടി ഉയരത്തിൽ നടന്ന അപ്രതീക്ഷിത രക്ഷാബന്ധൻ ആഘോഷമാണ് ഇപ്പോൾ സോഷ്യൽ മീഡിയ തൂക്കിയത്.
ഒരാൾ മാത്രമല്ല, വിമാനത്തിലെ മുഴുവൻ ക്യാബിൻ ക്രൂവും തന്നെ സഹോദരനാക്കിയെന്നാണ് സുധാൻഷുവിന്റെ രസകരമായ പ്രതികരണം.
സംഭവത്തിന്റെ വീഡിയോ സുധാൻഷു സമൂഹമാധ്യമത്തിൽ പങ്കുവച്ചതോടെയാണ് ആളുകളുടെ ശ്രദ്ധ നേടിയത്. വീഡിയോയിൽ എയർ ഇന്ത്യയിലെ ഒരു വനിതാ ക്യാബിൻ ക്രൂ അംഗം സുധാൻഷുവിന്റെ കൈയിൽ റാഖി കെട്ടുന്നത് കാണാം. മറ്റൊരു ജീവനക്കാരി ഈ രംഗം മൊബൈൽ ഫോണിൽ പകർത്തുന്നുമുണ്ട്.
“എന്റെ വിമാനത്തിലെ മുഴുവൻ ഫ്ലൈറ്റ് അറ്റൻഡന്റർമാരും എന്നെ ബ്രോ-സോൺ ചെയ്യാൻ തീരുമാനിച്ചു” എന്ന രസകരമായ കുറിപ്പോടെയാണ് സുധാൻഷു വീഡിയോ പങ്കുവച്ചത്. വൈകാതെ സമൂഹമാധ്യമങ്ങളിൽ വീഡിയോ ചിരിപടർത്തുന്ന കാഴ്ചയായി മാറി.
വീഡിയോയ്ക്ക് താഴെ രസകരമായ കമന്റുകളുമായി നിരവധി പേരും എത്തി. ചിലർ സംഭവത്തെ “ഏറ്റവും വലിയ പേടിസ്വപ്നം” എന്ന് വിശേഷിപ്പിച്ചപ്പോൾ, റാഖി അപ്രതീക്ഷിതമായി ലഭിച്ചാൽ എന്ത് സംഭവിക്കുമെന്നതിനെക്കുറിച്ചും പലരും തമാശകൾ പങ്കുവച്ചു.
വീഡിയോയിലെ ജീവനക്കാരി അപൂർവ ദിവാൻ ആണെന്നാണ് സൂചന. ‘സുധാൻഷുവിനെ റാഖി കെട്ടാൻ നിർബന്ധിച്ചതല്ലെന്നും അദ്ദേഹം സ്വമേധയാ തയാറായതാണെന്നുമുള്ള രസകരമായ വെളിപ്പെടുത്തലായിരുന്നു സുധാൻഷുവിന്റെ വീഡിയോയ്ക്ക് അപൂർവയുടെ മറുപടി. ഇതോടെ വിമാനത്തിലെ ‘ബ്രോ-സോണിംഗ്’ കഥയ്ക്ക് മറ്റൊരു രസകരമായ ട്വിസ്റ്റ് കൂടി ലഭിച്ചു.
