രാത്രി വൈകിയുള്ള വിമാനയാത്രയ്ക്കിടെ ഹൊറർ ചിത്രം കണ്ട യാത്രക്കാരൻ പേടിച്ചലറിയത് സഹയാത്രികരെ ഞെട്ടിച്ചു. ആകാശയാത്രയ്ക്കിടെ സിനിമയിലെ ഏറ്റവും ഭയാനകമായ രംഗം കണ്ട് ഇയാൾ ഉറക്കെയലറിയതോടെ വിമാനത്തിലുണ്ടായിരുന്ന കുഞ്ഞ് പേടിച്ചരണ്ട് ഉണർന്നു.
‘ഒബ്സെഷൻ’ എന്ന അമേരിക്കൻ സൂപ്പർനാച്ചുറൽ ഹൊറർ ചിത്രം ആദ്യമായി കാണുകയായിരുന്നു യുവാവ്. തൊട്ടടുത്ത സീറ്റിലിരുന്ന യാത്രക്കാരനാണ് ഈ രസകരവും ഞെട്ടിക്കുന്നതുമായ രംഗങ്ങൾ ക്യാമറയിൽ പകർത്തിയത്.
കാറിന്റെ ജനൽച്ചില്ല് വലിയൊരു കല്ലുകൊണ്ട് തകർത്ത് നായിക ആക്രമണം നടത്തുന്ന സിനിമയിലെ ഏറ്റവും ക്രൂരമായ രംഗം കണ്ടാണ് യുവാവ് പേടിച്ചരണ്ടത്. ഞെട്ടിത്തെറിച്ച് സീറ്റിൽ നിന്ന് ചാടിയ ഇയാൾ ഉറക്കെ നിലവിളിക്കുകയായിരുന്നു.
കറി ബാർക്കർ സംവിധാനം ചെയ്ത ഈ ചിത്രത്തിലെ ഈ രംഗം കടുത്ത അക്രമം നിറഞ്ഞതായതിനാൽ മേയിൽ ഇന്ത്യയിൽ റിലീസ് ചെയ്ത പതിപ്പിൽ നിന്നും സെൻസർ ചെയ്ത് മാറ്റിയിരുന്നു. സംഭവത്തിന്റെ വീഡിയോ ഇൻസ്റ്റാഗ്രാമിൽ പങ്കുവെച്ചതോടെ വലിയ രീതിയിലാണ് വൈറലാകുന്നത്.
