അമ്പലപ്പുഴ: വിശേഷ ദിവസങ്ങളിൽ പെട്രോൾ പമ്പ് അടച്ചിടുന്നു. ഉപഭോക്താക്കൾ ദുരിതത്തിൽ.നടപടി സ്വീകരിക്കാതെ അധികൃതർ.ദേശീയ പാതയോരത്ത് വണ്ടാനത്ത് പ്രവർത്തിക്കുന്ന പെട്രോൾ പമ്പാണ് ഇത്തരത്തിൽ അടച്ചിടുന്നത്.
ബക്രീദ് ദിനമായ വ്യാഴാഴ്ചയും പമ്പ് അടച്ചിട്ടിരുന്നു. ഓണം, പെരുനാൾ തുടങ്ങി എല്ലാ ഉത്സവ ദിവസങ്ങളിലും മറ്റ് വിശേഷ ദിവസങ്ങളിലും ഈ പെട്രോൾ പമ്പ് തുറക്കാറില്ല.ഇതിനെതിരെ ഉപഭോക്താക്കൾ പരാതി നൽകിയിട്ടും സിവിൽ സപ്ളൈസ് അധികൃതർ യാതൊരു നടപടിയും സ്വീകരിച്ചിട്ടില്ല.
അവശ്യ സർവീസിൽ ഉൾപ്പെടുന്ന പെട്രോൾ പമ്പുകൾ 24 മണിക്കൂറും പ്രവർത്തിക്കണമെന്നാണ് നിയമം. എന്നാൽ ഈ നിയമം കുറേ നാളായി ഈ പെട്രോൾ പമ്പിൽ പാലിക്കാറില്ല. ഇരു ചക്ര വാഹനക്കാരാണ് ഇതു മൂലം ഏറ്റവും കൂടുതൽ ദുരിതത്തിലാകുന്നത്.
വണ്ടാനം കഴിഞ്ഞാൽ കിലോമീറ്ററുകൾക്കപ്പുറം കാക്കാഴം, കപ്പക്കട എന്നിവിടങ്ങളിലാണ് പമ്പുകൾ ഉള്ളത്. വണ്ടാനത്തെ പെട്രോൾ പമ്പ് ഇത്തരത്തിൽ തുറന്നു പ്രവർത്തിക്കാത്തതിനെതിരെ പെട്രോളിയം കമ്പനിക്ക് പരാതി നൽകാനൊരുങ്ങുകയാണ് നാട്ടുകാർ.
