കാസര്ഗോഡ്: മഞ്ചേശ്വരം നിയോജകമണ്ഡലത്തില് സ്ഥാനാര്ഥിയായി സിപിഎം ജില്ലാ സെക്രട്ടറിയേറ്റംഗം കെ.ആര്. ജയാനന്ദയെ തീരുമാനിച്ചതിനെതിരേ പ്രതിഷേധവുമായി ഡിവൈഎഫ്ഐ. ഞായറാഴ്ച സിപിഎം സംസ്ഥാനകമ്മിറ്റിയംഗം എം.വി. ജയരാജന്റെ സാന്നിധ്യത്തില് ചേര്ന്ന ജില്ലാകമ്മിറ്റിയോഗത്തിലാണ് ജയാനന്ദയെ സ്ഥാനാര്ഥിയായി തീരുമാനിച്ചത്.
സിപിഎമ്മിന്റെ കന്നഡ മേഖലയിലെ പ്രമുഖ നേതാവായ ജയാനന്ദയ്ക്ക് ഇത്രയും കാലത്തെ രാഷ്ട്രീയജീവിതത്തില് തെരഞ്ഞെടുപ്പ് രാഷ്ട്രീയത്തില് കാര്യമായ അവസരങ്ങളൊന്നും ലഭിക്കാതിരുന്നതാണ് പരിഗണിക്കാനുള്ള പ്രധാനകാരണം. ബിജെപിക്ക് അനുകൂലമായി വോട്ട് ധ്രുവീകരണമുണ്ടാകുന്നത് തടയാനും ജയാനന്ദയുടെ സ്ഥാനാര്ഥിത്വം കൊണ്ട് സാധിക്കുമെന്നും പാര്ട്ടി നേതൃത്വം വിലയിരുത്തി.
എന്നാല് തീരുമാനം മാറ്റണമെന്നും മുന് ജില്ലാ പഞ്ചായത്ത് വൈസ്പ്രസിഡന്റ് ഷാനവാസ് പാദൂരിനെ മത്സരിക്കണമെന്നുമാണ് ഡിവൈഎഫ്ഐയുടെ ആവശ്യം. ഡിവൈഎഫ്ഐ കുമ്പള, ബായാര് വില്ലേജ് കമ്മിറ്റികള് ഇതുസംബന്ധിച്ച് സിപിഎം ജില്ലാ നേതൃത്വത്തിന് കത്ത് നല്കി.
സംസ്ഥാനം ഉറ്റുനോക്കുന്ന വാശിയേറിയ ത്രികോണപോരാട്ടം നടക്കുന്ന മഞ്ചേശ്വരത്ത് കരുത്തനായ സ്ഥാനാര്ഥിയെ തന്നെ രംഗത്തിറക്കണമെന്നും ഷാനവാസിനെപോലൊരു യുവസ്ഥാനാര്ഥിയുടെ സാന്നിധ്യം എല്ഡിഎഫിന് ഏറെ ഗുണം ചെയ്യുമെന്നുമാണ് ഡിവൈഎഫ്ഐയുടെ നിലപാട്. സാമൂഹ്യമാധ്യമങ്ങളിലും ഷാനവാസിനുവേണ്ടി വലിയതോതിലുള്ള പ്രചാരണമാണ് ഡിവൈഎഫ്ഐ നടത്തുന്നത്.
ജില്ലയിലെ മുതിര്ന്ന കോണ്ഗ്രസ് നേതാവ് പാദൂര് കുഞ്ഞാമു ഹാജിയുടെ മകനായ ഷാനവാസ് പിതാവിന്റെ മരണശേഷം ഉദുമ ഡിവിഷന് സീറ്റ് നല്കാത്തതില് പ്രതിഷേധിച്ചാണ് കോണ്ഗ്രസ് വിട്ട് ഇടതുമുന്നണിയിലേക്ക് ചേക്കേറിയത്. 2020ലെ തദ്ദേശതെരഞ്ഞെടുപ്പില് ഷാനവാസ് മുസ്ലിംലീഗ് കോട്ടയായ ചെങ്കള ഡിവിഷനില് അട്ടിമറിവിജയത്തിലൂടെ എല്ഡിഎഫിന് ഭരണം നേടിക്കൊടുത്തത്. ഇത്തവണ ഈ സീറ്റ് വനിതാസംവരണമായതിനാല് ഷാനവാസ് മത്സരിച്ചില്ല.
