കൊച്ചി: റോഡില് താഴ്ന്നുകിടക്കുന്ന കേബിളില് കുരുങ്ങി ഇരുചക്ര വാഹനങ്ങളില് സഞ്ചരിക്കുന്നവര് സ്ഥിരമായി അപകടത്തില്പ്പെടുന്ന സാഹചര്യത്തില് അപകടങ്ങള് ഒഴിവാക്കുന്നതുമായി ബന്ധപ്പെട്ട് നിയോഗിച്ച വിദഗ്ധ സമിതി, വൈദ്യുതിവകുപ്പിന് നല്കിയ റിപ്പോര്ട്ടില് ആറാഴ്ചക്കകം സര്ക്കാര് അന്തിമതീരുമാനമെടുക്കണമെന്ന് മനുഷ്യാവകാശ കമ്മീഷന് ചെയര്പേഴ്സണ് ജസ്റ്റീസ് അലക്സാണ്ടര് തോമസ്.
ഇക്കാര്യത്തില് ഇനിയും കാലതാമസം പാടില്ലെന്ന് കമ്മീഷന് വൈദ്യുതിവകുപ്പ് അഡീഷണല് ചീഫ് സെക്രട്ടറിക്ക് നിര്ദേശം നല്കി. അന്തിമ റിപ്പോര്ട്ട് സര്ക്കാര് കമ്മീഷനില് സമര്പ്പിക്കണം.കളമശേരി ഇഖറ മസ്ജിദ് ഇമാം അബ്ദുള് അസീസ് ഓടിച്ച ബൈക്ക് 2024 ഓഗസ്റ്റ് 20 ന് കേബിളില് കുരുങ്ങി അപകടത്തില്പെട്ടതിന്റെയും സമാന സംഭവങ്ങളുടെയും അടിസ്ഥാനത്തില് കമ്മീഷന് സ്വമേധയാ രജിസ്റ്റര് ചെയ്ത കേസിലാണ് നടപടി.
വിദഗ്ദ്ധ സമിതി രൂപീകരിച്ച് വിഷയം പഠിക്കാന് ജസ്റ്റിസ് അലക്സാണ്ടര് തോമസ് ഊര്ജ വകുപ്പ് സെക്രട്ടറിക്ക് നിര്ദേശം നല്കി. ഇതിന്റെ അടിസ്ഥാനത്തില് കഴിഞ്ഞ വര്ഷം ഓഗസ്റ്റ് 30 ന് കെഎസ്ഇബി സുരക്ഷാവിഭാഗം ഡയറക്ടറുടെ അധ്യക്ഷതയില് സര്ക്കാര് അഞ്ചംഗ കമ്മറ്റി രൂപീകരിച്ച് ഉത്തരവിറക്കി. ഇതില് ഡപ്യൂട്ടി ഇലക്ട്രിക്കല് ഇന്സ്പെക്ടര് രൂപക്, ട്രാഫിക് എസ്പി, ട്രാഫിക് സൗത്ത് എസ്പി, തദ്ദേശസ്വയംഭരണ വകുപ്പ് അസി. എക്സിക്യൂട്ടീവ് എന്ജിനീയര് ആര്.എസ്. രശ്മി എന്നിവര് അംഗങ്ങളായിരുന്നു.
കേബിള് അപകടങ്ങള് ഒഴിവാക്കുന്നതിനുള്ള ഒമ്പത് നിര്ദേശങ്ങള് കമ്മറ്റി സര്ക്കാരിന് സമര്പ്പിച്ചു. തുടര്ന്ന് ഈര്ജ വകുപ്പ് ജോയിന്റ് സെക്രട്ടറി കമ്മീഷന് സിറ്റിംഗില് ഹാജരായി.ഊര്ജ, നിയമ വകുപ്പ് ഉദ്യോഗസ്ഥര് ഉന്നത സമിതിയുടെ റിപ്പോര്ട്ട് പരിശോധിച്ച് സര്ക്കാരിന് നിയമപരമായ ശുപാര്ശകള് സമര്പ്പിക്കാന് നിര്ദ്ദേശം നല്കിയതായി ജോയിന്റ് സെക്രട്ടറി അറിയിച്ചു.
അന്തിമ തീരുമാനം എടുക്കുന്നതിന് മുമ്പ് കെഎസ്ഇബി, തദ്ദേശ സ്വയംഭരണവകുപ്പ് ഉദ്യോഗസ്ഥരുമായി കൂടിയാലോചന നടത്തണമെന്ന് കമ്മീഷന് നിര്ദ്ദേശിച്ചു. മാര്ച്ചില് എറണാകുളത്ത് നടക്കുന്ന സിറ്റിംഗില് കേസ് പരിഗണിക്കുമ്പോള് സര്ക്കാര് തീരുമാനം അറിയിക്കണമെന്ന് ഉത്തരവില് പറഞ്ഞു.
