മാഡ്രിഡ്: ബാഴ്സലോണയുടെ സ്പാനിഷ് ഇതിഹാസം ചാവി ഹെർണാണ്ടസ് വീണ്ടും പഴയ ക്ലബ്ബിൽ. ഇക്കുറി പരിശീലകനായാണു മടക്കം. നിലവിൽ ഖത്തർ ഫുട്ബോൾ ക്ലബ്ബായ അൽസാദിന്‍റെ പരിശീലകനാണു ചാവി.
ബാഴ്സലോണ മുന്നോട്ടുവച്ച കരാറിന് അൽസാദ് സമ്മതം അറിയിച്ചതായാണു റിപ്പോർട്ട്. സീസണിലെ മോശം പ്രകടനത്തെത്തുടർന്നു റൊണാൾഡ് കൂമാനെ ബാഴ്സലോണ പരിശീലകസ്ഥാനത്തുനിന്നു പുറത്താക്കിയിരുന്നു.
ബാഴ്സയുടെ ചരിത്രത്തിലെ ഏറ്റവും മികച്ച കളിക്കാരിലൊരാളാണു ചാവി. 1997 മുതൽ 2015 വരെ ബാഴ്സയ്ക്കുവേണ്ടി കളിച്ച ചാവി 25 കിരീട നേട്ടങ്ങളിൽ പങ്കാളിയായി. 767 മത്സരങ്ങളിൽ ബൂട്ടുകെട്ടിയ ചാവി, 85 ഗോളുകളും 185 അസിസ്റ്റുകളും പേരിലാക്കി. 2015ൽ ബാഴ്സ വിട്ട ചാവി പിന്നീട് അൽസാദിലേക്കു മാറുകയായിരുന്നു.
