മൂലമറ്റം: സിലിണ്ടറിൽ പാചകവാതകം നിറയ്ക്കാതെ സീൽ ചെയ്തു നൽകിയതായി ആക്ഷേപം.
തൊടുപുഴയിൽ പ്രവർത്തിക്കുന്ന ഏജൻസി നൽകിയ സിലിണ്ടറിലാണ് പാചകവാതകം ഇല്ലാതെ ലഭിച്ചത്.
കഴിഞ്ഞ വെള്ളിയാഴ്ച വിതരണ വാഹനം വന്നപ്പോൾ മൂലമറ്റത്തെ ഒരു വ്യാപാരിയുടെ കടയിൽ ഇലപ്പള്ളി സ്വദേശി ഏൽപിച്ചിരുന്ന സിലിണ്ടർ മാറാൻ ബുക്കും പണവും കടയുടമ ഇവരെ ഏൽപിച്ചു.
പണം വാങ്ങി സിലിണ്ടറും ഇറക്കി വാഹനം പോയി. ഇന്നലെ ഉടമ വന്ന് സിലിണ്ടർ എടുത്തപ്പോഴാണ് പാചക വാതകം ഇല്ലെന്നറിയുന്നത്.
തുടർന്ന് ഏജൻസിയുമായി ബന്ധപ്പെട്ടപ്പോൾ സിലിണ്ടർ പരിശോധിച്ച് എടുക്കണമെന്നുള്ള മറുപടിയാണ് ലഭിച്ചതെന്നാണ് ഉപഭോക്താവിന്റെ പരാതി.
