സിൻസിനാറ്റി: സെർബിയൻ പുരുഷ ടെന്നീസ് സിംഗിൾസ് താരം നൊവാക് ജോക്കോവിച്ച് എടിപി ടൂർ ചരിത്രത്തിൽ പുതിയൊരു റിക്കാർഡ് കുറിച്ചു. ഏതെങ്കിലും ഒരു കളിക്കാരനെതിരേ തോൽവിയില്ലാതെ ഏറ്റവും കൂടുതൽ ജയം എന്ന റിക്കാർഡാണു ജോക്കോവിച്ച് സ്വന്തമാക്കിയത്. സ്പാനിഷ് സൂപ്പർ താരം റാഫേൽ നദാലിന്‍റെ റിക്കാർഡാണു ജോക്കോവിച്ച് തകർത്തത്.
സിൻസിനാറ്റി മാസ്റ്റേഴ്സ് ടെന്നീസ് പ്രീക്വാർട്ടറിൽ ഫ്രാൻസിന്‍റെ ഗായേൽ മോൻഫിൽസിനെ തോൽപ്പിച്ചതോടെയാണ് ജോക്കോവിച്ച് ചരിത്ര നേട്ടത്തിലെത്തിയത്. 6-3, 6-2നായിരുന്നു ജോക്കോവിച്ചിന്റെ ജയം.
ഇതോടെ മോൻഫിൽസിനെതിരേ 19-0ന്‍റെ വിജയ-പരാജയ കണക്കാണു ജോക്കോവിച്ചിനുള്ളത്. ഹെഡ് ടു ഹെഡിൽ ഒരു താരത്തിനെതിരേ തോൽവിയില്ലാതെ ഏറ്റവും കൂടുതൽ ജയമെന്ന റിക്കാർഡ് സെർബിയൻ താരം ഇതോടെ സ്വന്തമാക്കി.
സ്പെയിനിന്‍റെ റാഫേൽ നദാൽ ഫ്രാൻസിന്‍റെ റിച്ചാർഡ് ഗാസ്ക്വെറ്റിനെതിരേ നേടിയ 18-0 എന്ന റിക്കാർഡ് ഇതോടെ പഴങ്കഥയായി.
പുരുഷ സിംഗിൾസ് ചരിത്രത്തിൽ ഏറ്റവും കൂടുതൽ ഗ്രാൻസ്‌ലാം (23) സ്വന്തമാക്കിയ താരമാണ് ജോക്കോവിച്ച്. സിൻസിനാറ്റി ക്വാർട്ടറിൽ അമേരിക്കയുടെ ടെയ്‌ലർ ഫ്രിറ്റ്സാണു ജോക്കോവിച്ചിന്റെ എതിരാളി.
