ഉപ്പും മുളകും താരം ലച്ചു എന്ന ജൂഹി രുസ്തഗിയെ ട്രോളിക്കൊല്ലുകയാണ് ഇപ്പോള്‍ ട്രോളന്മാര്‍. ജൂഹിയുടെ ഏറ്റവും പുതിയ അഭിമുഖവും ട്രോളന്മാര്‍ക്ക് ഇഷ്ടവിഷയമായിരിക്കുകയാണ്. പുതിയ വീഡിയോയില്‍ ട്രോളന്മാരെ ട്രോളിക്കൊല്ലരുതെന്ന് പറഞ്ഞാണ് ജൂഹി വീഡിയോയില്‍ എത്തുന്നത് തന്നെ. എന്നാല്‍ അതൊന്നും മുഖവിലയ്ക്ക് എടുക്കാതെയാണ് ട്രോളന്മാരുടെ ചെയ്തികള്‍.
രസകരമായ വീഡിയോയില്‍ ജൂഹി തന്റെ മനസ് തുറന്ന് സംസാരിക്കുന്നുണ്ട്. പ്രണയത്തെ കുറിച്ചും ഉപ്പും മുളകിനെ കുറിച്ചുമെല്ലാം ജൂഹി വാചാലയാകുന്നുണ്ട്. ഇതിനിടെ തന്നെ പ്രശസ്തയാക്കിയതിന് ട്രോളന്മാര്‍ക്ക് കൈ കൂപ്പി നന്ദി പറയുന്നുമുണ്ട് താരം. എന്നാല്‍ ജൂഹിയുടെ അപേക്ഷയും നന്ദിയും ട്രോളന്മാരെ ട്രോളുന്നതില്‍ നിന്നും പിന്തിരിപ്പിച്ചിട്ടില്ല. അഭിമുഖത്തില്‍ ജൂഹി നല്‍കിയ ഉത്തരങ്ങളെ സിനിമ രംഗങ്ങളുമായി ചേര്‍ത്തുവച്ച് രസകരമായ ട്രോളാണ് തയ്യാറാക്കിയിരിക്കുന്നത്. ഇതിന്റെ വീഡിയോ ഇപ്പോള്‍ സോഷ്യല്‍ മീഡിയയില്‍ വൈറലാണ്.
പാതി മലയാളിയാണ് ജൂഹി രുസ്തഗി. ജൂഹിയുടെ അമ്മ മലയാളിയായ ഭാഗ്യലക്ഷ്മിയാണ്. അച്ഛന്‍ രാജസ്ഥാന്‍ സ്വദേശിയായ രഘുവീര്‍ ശരണ്‍ രുസ്തഗി. ചോറ്റാനിക്കര മഹാത്മാഗാന്ധി പബ്ലിക് സ്‌കൂളില്‍ വിദ്യാര്‍ത്ഥിയായിരിക്കെയാണ് ജൂഹി ഉപ്പും മുളകും എന്ന സീരിയലില്‍ എത്തുന്നത്. ഉപ്പും മുളകിന്റെ വിധായകന്‍ ഉണ്ണികൃഷ്ണന്റെ മകന്‍ അനന്തകൃഷ്ണന്‍ ജൂഹിയുടെ സുഹൃത്തായിരുന്നു. ഒരു പിറന്നാള്‍ ആഘോഷത്തിന് പങ്കെടുക്കാന്‍ സുഹൃത്തിന്റെ വീട്ടില്‍ പോയതാണ് ജൂഹിയുടെ ജീവിതത്തില്‍ വഴിത്തിരിവായത്. ഇപ്പോള്‍ ഫാഷന്‍ ഡിസൈന്‍ കോഴ്‌സ് ചെയ്യുകയാണ് ജൂഹി. ഉപ്പും മുളകില്‍ ഉപയോഗിക്കുന്ന ജൂഹി ഉപയോഗിക്കുന്ന മിക്ക വസ്ത്രങ്ങളും സ്വയം ഡിസൈന്‍ ചെയ്യുന്നതാണ്. എന്തായാലും ട്രോളന്മാരെ പേടിച്ചിട്ട് ജൂഹിയ്ക്ക് ഇപ്പോള്‍ വായ തുറക്കാന്‍ വയ്യെന്നായി.
