നാദാപുരം: വളയത്ത് വാക്ക് തര്‍ക്കത്തിനിടെ അച്ഛനെ കുത്തി പരിക്കേല്‍പ്പിച്ച സംഭവത്തില്‍ മകനെ വളയം പോലീസ് കസ്റ്റഡിയിലെടുത്തു ഇയാള്‍ക്കെതിരെ വധ ശ്രമത്തിന് പോലീസ് കേസെടുത്തു.വളയം നിരവുമ്മലിലെ കക്കൂട്ടത്തില്‍ രാജന്‍ (55) ആണ് കത്തിക്കുത്തില്‍ പരിക്കേറ്റത്.വയറിന് മുകളിലായി ആഴത്തില്‍ കുത്തേറ്റ രാജന്‍ കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സയിലാണ്.
സംഭവവുമായി ബന്ധപ്പെട്ട് ഇയാളുടെ മകന്‍ രാജേഷ് (27) നെ വളയം പോലീസ് കസ്റ്റഡിയിലെടുത്തു.കുത്താനുപയോഗിച്ച ആയുധം പോലീസ് കണ്ടെത്തി. തിങ്കളാഴ്ച ഉച്ചയ്ക്ക് പന്ത്രണ്ട് മണിയോടെയായിരുന്നു സംഭവം. വീട്ടില്‍ നിന്ന് രാജനും സുഹൃത്തും ഭക്ഷണം കഴിച്ച് കൊണ്ടിരിക്കുന്നതിനിടെ മൂത്ത മകന്‍ രാജേഷ് വീട്ടിലെത്തുകയും രാജനുമായി വാക്കുതര്‍ക്കത്തിലേര്‍പ്പെടുകയുമായിരുന്നു.
ഇതിനിടെ പ്രകോപിതനായ രാജേഷ് അരയില്‍ കരുതി വെച്ച കത്തി എടുത്ത് രാജന്‍റെ വയറിന് കുത്തുകയായിരുന്നു.
വീട്ടുകാരുടെ ബഹളം കേട്ട് ഓടിയെത്തിയ നാട്ടുകാര്‍ ചേര്‍ന്ന് രാജനെ കല്ലാച്ചിയിലെ സ്വകാര്യ ആശുപത്രിയില്‍ പ്രാഥമിക ചികിത്സ നല്‍കിയ ശേഷം കോഴിക്കോട് മെഡിക്കല്‍ കോളജില്‍ പ്രവേശിപ്പിച്ചു. ഇയാള്‍ അപകട നില തരണം ചെയ്തതായും ശസ്ത്രക്രിയ നടത്തിയതായും പോലീസ് പറഞ്ഞു. പ്രതിയുടെ അറസ്റ്റ് ഇന്ന് വൈകുന്നേരം രേഖപ്പെടുത്തുമെന്ന് എസ്ഐ പറഞ്ഞു.
