കുമരകം: ബാങ്കിന്‍റെ എടിഎമ്മിൽ നിന്നും ലഭിച്ച കറൻസിനോട്ടുകൾ കൈമാറ്റം ചെയ്യാൻ സാധിക്കാത്തവയാണെന്ന് പരാതി. കീറിയതും ഒട്ടിച്ചതുമായ നോട്ടുകളാണ് ഏറെയും. മഷി പുരണ്ട നോട്ടുകൾക്കും കുറവില്ല. ഇന്നു രാവിലെ കുമരകത്തെ ഒരു എടിഎമ്മിൽ നിന്നും ലഭിച്ച നോട്ടുകളാണ് ഉപയോഗ ശൂന്യമായ നിലയിലുള്ളത്.
20,000 രൂപ പിൻവലിച്ച ഉപയോക്താവിന് ലഭിച്ച 500 രൂപ നോട്ടുകളിലേറെയും കീറി പ്ലാസ്റ്റിക് ഒട്ടിച്ചവയായിരുന്നു. തുടർന്ന് ഈ എംടിഎമ്മിൽ നിന്ന് പണമെടുത്ത പലർക്കും മോശം നോട്ടുകളാണ് ലഭിച്ചത്. രാവിലെ അത്യാവശ്യത്തിന് പണമെ ടുത്തവർ നോട്ട് ബാങ്കിൽ നൽകി മാറിയെടുക്കേണ്ട ഗതികേടിലാണ്.
