ഹൂബ്ലി: ജമ്മു-കാഷ്മീരിന് എതിരായ രഞ്ജി ട്രോഫി ക്രിക്കറ്റ് ഫൈനലില് കര്ണാടകയുടെ മായങ്ക് അഗര്വാളിന് സെഞ്ചുറി. 207 പന്തില് 130 റണ്സുമായി ക്രീസില് തുടരുന്ന മായങ്കിന്റെ ബലത്തില് അഞ്ച് വിക്കറ്റ് നഷ്ടത്തില് 220 റണ്സ് എന്ന നിലയില് കര്ണാടക മൂന്നാംദിനം ഒന്നാം ഇന്നിംഗ്സ് അവസാനിപ്പിച്ചു. അഞ്ച് വിക്കറ്റ് കൈയിലിരിക്കേ 364 റണ്സ് പിന്നിലാണ് കര്ണാടക.
ജമ്മു-കാഷ്മീര് ഒന്നാം ഇന്നിംഗ്സില് 584 റണ്സ് എടുത്തശേഷമാണ് പുറത്തായത്. ഒന്നാം ഇന്നിംഗ്സ് ലീഡ് നേടിയാല് ജമ്മു-കാഷ്മീരിന് കന്നി രഞ്ജി ട്രോഫി കിരീടം എന്ന ചരിത്രനിമിഷം സ്വന്തമാക്കാം. അതേസമയം, ലീഡ് വഴങ്ങാതിരിക്കാനുള്ള തീവ്രശ്രമത്തിലാണ് കര്ണാടക.
ക്രുതിക് കൃഷ്ണയാണ് (27 നോട്ടൗട്ട്) മായങ്ക് അഗര്വാളിനൊപ്പം ക്രീസില്. ജമ്മു-കാഷ്മീരിന്റെ അഖ്വിബ് നബി മൂന്നു വിക്കറ്റ് സ്വന്തമാക്കി. നാല് വിക്കറ്റ് നഷ്ടത്തില് 57 എന്ന നിലയില്നിന്നാണ് കര്ണാടക കരകയറിയത്. കര്ണാടകയുടെ കെ.എല്. രാഹുല് (13), ദേവ്ദത്ത് പടിക്കല് (11), കരുണ് നായര് (0) എന്നീ പ്രമുഖര്ക്ക് കാര്യമായൊന്നും ചെയ്യാന് സാധിച്ചില്ല.
