കൊല്ലം: വീണ്ടും മോര്‍ഫിംഗ് പരാതിയുമായി വിദ്യാർഥികള്‍. സഹപാഠികളുടെയും അധ്യാപകരുടെയും ഫോട്ടോയെടുത്ത് മോര്‍ഫ് ചെയ്തെന്ന പരാതിയുമായാണ് വീണ്ടും വിദ്യാർഥികൾ രംഗത്തെത്തിയത്. പെൺകുട്ടികളുടെ പരാതിയെത്തുടര്‍ന്ന് പുനലൂര്‍ സര്‍ക്കാര്‍ പോളിടെക്നിക് കോളജിലെ വിദ്യാർഥിയെ സസ്‌പെന്‍ഡ് ചെയ്തു.
മൂന്നാംവര്‍ഷ ഇലക്ട്രിക്കല്‍ ആന്‍ഡ് ഇലക്ട്രോണിക്സ് വിദ്യാര്‍ഥി എസ്. അച്യുതിനെയാണ് സസ്‌പെന്‍ഡ് ചെയ്തത്. സസ്‌പെന്‍ഡ് ചെയ്തുകൊണ്ടുള്ള ഉത്തരവ് സാങ്കേതിക വിദ്യാഭ്യാസ വകുപ്പിന് കൈമാറി.
കുട്ടികളുടെ പരാതിക്ക് പിന്നാലെ അക്കാദമിക്ക് കൗണ്‍സില്‍ ചേരുകയും പ്രതിയുടെ രക്ഷകര്‍ത്താക്കളെ വിളിച്ചുവരുത്തുകയും ചെയ്തിരുന്നു. പിന്നാലെ അവിടെ‌വച്ച് കാര്യങ്ങള്‍ സംസാരിച്ചപ്പോഴാണ് അച്യുത് ഇത്തരം കുറ്റകൃത്യങ്ങള്‍ ചെയ്തിരുന്നു എന്ന് സമ്മതിച്ചത്. കാക്കനാട് ഭാരത് മാതാ കോളജില്‍ നടന്ന മോര്‍ഫിംഗിന് സമാനമായ വ്യാപ്തി ഉണ്ടോ എന്നതടക്കമുള്ള കാര്യങ്ങള്‍ പൊലീസ് പരിശോധിക്കുമെന്നാണ് വിവരം. സംഭവത്തിൽ ഉടന്‍ തന്നെ കേസെടുത്ത് അന്വഷണം ആരംഭിക്കും.
