നേപ്പാളിൽ വൻ നാശം വിതച്ച മിന്നൽ പ്രളയത്തിനിടയിലും തകരാതെ ഉറച്ചുനിന്ന ഒരു പച്ചച്ചായം പൂശിയ വീടിന്റെ ദൃശ്യങ്ങൾ സോഷ്യൽ മീഡിയയിൽ വൈറലാകുന്നു. മിനിറ്റുകൾക്കുള്ളിൽ വീടുകളും കെട്ടിടങ്ങളും ഒലിച്ചുപോവുകയും നിരവധി മനുഷ്യ ജീവനുകൾ കവരുകയും ചെയ്ത പ്രളയക്കെടുതിക്കിടയിലാണ് പ്രകൃതിയുടെ സർവ്വസംഹാര ശക്തിയെ അതിജീവിച്ച ഈ അത്ഭുത കാഴ്ച ശ്രദ്ധനേടുന്നത്.
ശക്തമായ കുത്തൊഴുക്കുള്ള ചെളി വെള്ളത്താൽ ചുറ്റപ്പെട്ട വീടിനുള്ളിൽ ഒരു കുടുംബം കുടുങ്ങിക്കിടക്കുന്ന ആദ്യ വീഡിയോ പുറത്തുവന്നതോടെ വലിയ ആശങ്കയാണ് ഉയർന്നത്. സമീപത്തുള്ള മറ്റ് നിർമ്മിതികളെല്ലാം പ്രളയജലത്തിൽ അടിഞ്ഞുപോയപ്പോഴും ഈ വീട് മാത്രം ഉറച്ചുനിൽക്കുകയായിരുന്നു. പിന്നീട് പുറത്തുവന്ന ദൃശ്യങ്ങളിൽ വീടിനുള്ളിലുണ്ടായിരുന്ന കുടുംബാംഗങ്ങളെല്ലാം പ്രളയത്തെ അതിജീവിച്ച് സുരക്ഷിതരായി രക്ഷപ്പെട്ടതായി വ്യക്തമായി.
കോടിക്കണക്കിന് ആളുകളാണ് ഇതിനോടകം സോഷ്യൽ മീഡിയയിൽ ഈ ദൃശ്യങ്ങൾ കണ്ടത്. പ്രളയത്തിന്റെ അതിരൂക്ഷമായ ഒഴുക്കിനെ പോലുമതിജീവിച്ച കെട്ടിടത്തിന്റെ നിർമാണ മികവിനെയും ബലത്തെയും പ്രശംസിച്ച് നിരവധി പേർ കമന്റുകളുമായി രംഗത്തെത്തിയിട്ടുണ്ട്.
