കൊച്ചുകുട്ടികള്‍ വീടുവിട്ടിറങ്ങുന്നതും ട്രെയിനിലും മറ്റും സഞ്ചരിച്ച് ദൂരെയെത്തുന്നതുമായ സംഭവങ്ങള്‍ അനവധിയുണ്ടായിട്ടുണ്ട്.
എന്നാല്‍ വിമാനത്തില്‍ ഇത്തരത്തില്‍ ഒരു കുട്ടി എത്തപ്പെടുന്നത് അപൂര്‍വമായിരിക്കും. ഒന്‍പതു വയസ്സുള്ള ബ്രസീലിയന്‍ കുട്ടി ടിക്കറ്റില്ലാതെ വിമാനത്തില്‍ കയറി തന്റെ വീട്ടില്‍ നിന്ന് ഏകദേശം 3,000 കിലോമീറ്റര്‍ ഒറ്റയ്ക്ക് യാത്ര ചെയ്തതായുള്ള വിവരമാണ് ഇപ്പോള്‍ പുറത്തു വന്നിരിക്കുന്നത്.
ന്യൂയോര്‍ക്ക് പോസ്റ്റിന്റെ റിപ്പോര്‍ട്ട് അനുസരിച്ച്, ശനിയാഴ്ച രാവിലെ വടക്കുപടിഞ്ഞാറന്‍ ബ്രസീലിലെ മനാസിലെ വീട്ടില്‍ നിന്ന് ഇമ്മാനുവല്‍ മാര്‍ക്വെസ് ഡി ഒലിവേര എന്ന ആണ്‍കുട്ടിയെ കാണാതായി.
അവന്റെ അമ്മ ഡാനിയേല്‍ മാര്‍ക്വെസ് പറയുന്നതനുസരിച്ച്, അമ്മ അതിരാവിലെ ഉണര്‍ന്നപ്പോള്‍ ഇമ്മാനുവലിനെ അവന്റെ കിടക്കയില്‍ കണ്ടതായി അവര്‍ ഓര്‍ക്കുന്നു.
എന്നിരുന്നാലും, രണ്ട് മണിക്കൂറിന് ശേഷം മകന്‍ വീട്ടിലില്ല എന്ന് അമ്മ കണ്ടെത്തുന്ന നേരം ഇമ്മാനുവല്‍ വിമാനത്താവളത്തിലേക്ക് പോയിക്കഴിഞ്ഞിരുന്നു.
”ഞാന്‍ രാവിലെ 5:30 ന് ഉണര്‍ന്നു, അവന്റെ മുറിയിലേക്ക് പോയി, അവന്‍ സാധാരണയായി കാണുമ്പോലെ ഉറങ്ങുന്നത് കണ്ടു,” ഡാനിയേല്‍ ന്യൂസ്ഫ്‌ലാഷിനോട് പറഞ്ഞതായി ന്യൂയോര്‍ക്ക് പോസ്റ്റ് റിപ്പോര്‍ട്ട് ചെയ്തു.
ഉറക്കമുണര്‍ന്നതിന് ശേഷം താന്‍ ഫോണ്‍ ഉപയോഗിക്കുകയായിരുന്നുവെന്നും തുടര്‍ന്ന് രാവിലെ 7:30 ഓടെ ഇമ്മാനുവലിനെ നോക്കാന്‍ പോയെന്നും ഡാനിയേല്‍ പറഞ്ഞു.
അപ്പോഴാണ് മകന്‍ മുറിയില്‍ ഇല്ലെന്ന് ഡാനിയേലിന് മനസ്സിലായത്. ”ഞാന്‍ പരിഭ്രാന്തയാകാന്‍ തുടങ്ങി,” അവര്‍ കൂട്ടിച്ചേര്‍ത്തു.
റിപ്പോര്‍ട്ടുകള്‍ പ്രകാരം, ഇമ്മാനുവല്‍ ഒരു ലതം വിമാനത്തില്‍ കയറുകയും തന്റെ വീട്ടില്‍ നിന്ന് 2,698 കിലോമീറ്റര്‍ പിന്നിടുകയും ചെയ്തു.
വടക്കുപടിഞ്ഞാറന്‍ ബ്രസീലിലെ മനാവില്‍ നിന്ന് തെക്കുകിഴക്കന്‍ സംസ്ഥാനമായ സാവോ പോളോയില്‍ സ്ഥിതി ചെയ്യുന്ന ഗ്വാറുള്‍ഹോസ് നഗരത്തിലേക്ക് അവന്‍ യാത്ര ചെയ്തു. വിമാനടിക്കറ്റ് വാങ്ങാതെയാണ് ഇമ്മാനുവല്‍ അത് ചെയ്തത് എന്നതാണ് അതിലും ആശ്ചര്യം.
പ്രാദേശിക റിപ്പോര്‍ട്ടുകള്‍ അനുസരിച്ച്, ടിക്കറ്റില്ലാതെ വിമാനത്തില്‍ കയറാനുള്ള വഴികള്‍ അവന്‍ ഗൂഗിള്‍ ചെയ്തു, പൂര്‍ണ്ണമായും ശ്രദ്ധിക്കപ്പെടാതെ തുടര്‍ന്നു.
കാണാതായ കുട്ടിയെ ഓര്‍ത്ത് വേവലാതിപ്പെട്ട ഇമ്മാനുവേലിന്റെ അമ്മ, അവന്‍ സുരക്ഷിതമായി രാജ്യത്തിന്റെ മറുവശത്ത് എത്തിയെന്നറിഞ്ഞപ്പോള്‍ ആശ്വാസത്തോടെ നെടുവീര്‍പ്പിട്ടു.
ടിക്കറ്റോ യാത്രാ രേഖകളോ ലഗേജോ ഇല്ലാതെ ഇമ്മാനുവല്‍ വിമാനത്തില്‍ കയറിയ വഴി അന്വേഷിക്കാന്‍ മനാസ് എയര്‍പോര്‍ട്ട് മാനേജ്മെന്റ് ഇപ്പോള്‍ അന്വേഷണം ആരംഭിച്ചിട്ടുണ്ട്.
അതേസമയം, ലോക്കല്‍ പൊലീസ് വിമാനത്താവളത്തിലെ സിസിടിവി ദൃശ്യങ്ങള്‍ പരിശോധിച്ച് വിഷയം അന്വേഷിക്കും.
ഇമ്മാനുവല്‍ തന്റെ മറ്റ് കുടുംബാംഗങ്ങളെ സന്ദര്‍ശിക്കാന്‍ യാത്ര നടത്താന്‍ തീരുമാനിച്ചിരുന്നുവെന്നും അവന്റെ കുടുംബത്തിന് അക്രമത്തിന്റെ ചരിത്രമില്ലെന്നും പോലീസ് പറഞ്ഞു.
