മട്ടന്നൂർ: റോഡപകടങ്ങൾ ഒഴിവാക്കുന്നതിനു മോട്ടോർ വാഹനവകുപ്പിന്റെയും സ്റ്റുഡന്റ് പോലീസ് കാഡറ്റുകളുടെയും സംയുക്താഭിമുഖ്യത്തിൽ ഡ്രൈവർമാർക്കു നൽകിയ ബോധവത്കരണം ശ്രദ്ധേയമായി. ഇരിട്ടി മോട്ടോർ വാഹന വകുപ്പിന്റെ നേതൃത്വത്തിലായിരുന്നു ബോധവൽക്കരണം. ഇരിട്ടി മോട്ടോർ വാഹന വകുപ്പിന്റെ കീഴിൽ വരുന്ന പ്രദേശങ്ങളിൽ അപകടം ഇല്ലാതാക്കുന്നതിനാണു റോഡ് സുരക്ഷാ വാരാചരണം നടത്തുന്നത്.
ചാവശേരി ഗവ. ഹയർ സെക്കൻഡറി സ്കൂളിലെ സ്റ്റുഡന്റ് പോലീസ് കേഡറ്റുകളെ പങ്കെടുപ്പിച്ചാണ് വാഹന ഡ്രൈവർമാർക്ക് ബോധവത്കരണം നൽകിയത്. മട്ടന്നൂർ ഹയർ സെക്കൻഡറി സ്കൂളിനു മുന്നിൽ റോഡിന്റെ ഇരുഭാഗങ്ങളിലും വച്ചുമാണ് വാഹന ഡ്രൈവർമാർക്ക് ബോധവൽക്കരണം നൽകിയത്.
നിയമം തെറ്റിച്ചു വരുന്ന വാഹന ഡ്രൈവർമാർക്ക് ബോധവത്കരണത്തിന്റെ ഭാഗമായി ലഘുലേഖയും നിയമം പാലിച്ചു വരുന്ന ഡ്രൈവർമാർക്ക് മധുര പലഹാരം നൽകിയുമാണ് വിട്ടത്. ഇരിട്ടി ജോയിന്റ് ആർടിഒ ഡാനിയൽ സ്റ്റീഫൻ, അസിസ്റ്റന്റ് മോട്ടോർ വാഹന ഇൻസ്പെക്ടർ ശ്രീജേഷ് എന്നിവരുടെ നേതൃത്വത്തിലായിരുന്നു ബോധവത്കരണം.
റോഡ് സുരക്ഷാ വാരാചരണത്തിന്റെ ഭാഗമായാണ് ബോധവത്കരണവുമായി രംഗത്തെത്തിയതെന്നും പത്തുവരെ ബോധവത്കരണം തുടരുമെന്നും ഇരിട്ടി ജോയിന്റ് ആർടിഒ ഡാനിയൽ സ്റ്റീഫൻ പറഞ്ഞു.