എടത്വ: ഹരിതകര്മസേനാ അംഗത്തിന് നഷ്ടപ്പെട്ട താലിയും മാലയും ഒന്നരമാസത്തിനുശേഷം തിരികെ ലഭിച്ചു. എടത്വ പഞ്ചായത്ത് ഒന്നാം വാര്ഡ് കൊടുപ്പുന്ന ശ്രായിപ്പറമ്പ് സരിതാ സാബുവിനാണ് നഷ്ടപ്പെട്ട സ്വര്ണാഭരണങ്ങള് ഒന്നരമാസത്തിനുശേഷം തിരികെ ലഭിച്ചത്. എടത്വ മൂന്നുതൈയ്ക്കല് ജോണ്സി വര്ഗീസിനാണ് ഒരു പവന്റെ മാലയും നാലു ഗ്രാമിന്റെ താലിയും ലഭിച്ചത്.
നവംബര് 13ന് പ്ലാസ്റ്റിക് വേസ്റ്റ് ശേഖരിക്കാന് പോകുന്നതിനിടയില് നാലാം വാര്ഡില് വച്ചാണ് സരിതയ്ക്ക് മാലയും താലിയും നഷ്ടപ്പെട്ടത്. തുടര്ന്ന് സ്വര്ണാഭരണങ്ങള് നഷ്ടമായ വിവരം സോഷ്യല് മീഡിയായിലൂടെ അറിയിക്കുകയും ചെയ്തിരുന്നു.
നഷ്ടപ്പെട്ട മാലയും താലിയും ഒന്നരമാസം കഴിഞ്ഞിട്ടും ലഭിക്കാതിരുന്ന വിഷമത്തിലായിരുന്നു സരിത. കഴിഞ്ഞദിവസം ജോണ്സി മൂന്നുതൈയ്ക്കലിന് തന്റെ വീടിന്റെ പുറകിലെ പറമ്പില്നിന്ന് മാലയും താലിയും ലഭിക്കുകയായിരുന്നു.
ഹരിത കര്മസേനാംഗത്തിന് സ്വര്ണം നഷ്ടപ്പെട്ട വിവരം ശ്രദ്ധയില്പ്പെട്ടിരുന്ന ജോണ്സി നാലാം വാര്ഡിലെ ഹരിത കര്മസേനാംഗം സീമയെ ഫോണ് വിളിച്ച് സ്വര്ണം കിട്ടിയ വിവരം അറിയിക്കുകയായിരുന്നു.
സീമ അറിയിച്ചത് അനുസരിച്ച് സരിത ഹരിതകര്മസേനാംഗങ്ങളുമായി ജോണ്സിയുടെ വീട്ടിലെത്തി താലിയും മാലയും ഏറ്റുവാങ്ങുകയുമായിരുന്നു. ഹരിത കര്മസേന കണ്സോഷ്യം പ്രസിഡന്റ് ലില്ലി വര്ഗീസ്, സെക്രട്ടറി രമ പുഷ്പന്, സീമ ബിനു, ശൈലജ, ജാന്സി എന്നിവരുടെ നേതൃത്വത്തില് നാട്ടുകാരുടെ സാന്നിധ്യത്തില് ജോണ്സിയെ വീട്ടിലെത്തി ആദരിക്കുകയും ചെയ്തു.
