കഴിഞ്ഞ ദിവസം ഒരു അഭിമുഖത്തിൽ ഉർവശി ചേച്ചി പറഞ്ഞ ചില കാര്യങ്ങൾ എന്നെ വല്ലാതെ വിഷമിപ്പിച്ചു. ലോഞ്ച് ഇവന്റിൽ സദസിലുണ്ടായിരുന്ന ഒരു അമ്മ മലയാളത്തിൽ പറയൂ എന്ന ആംഗ്യം കാണിച്ചു, അതു കൊണ്ടാണ് താൻ അന്ന് അങ്ങനെ പറഞ്ഞത് എന്നായിരുന്നു ഉർവശി ചേച്ചി അഭിമുഖത്തിൽ പറഞ്ഞത്. എന്തുകൊണ്ടോ എനിക്കത് വിശ്വസിക്കാൻ കഴിയുന്നില്ല. എന്റെ പ്രശ്നമായിരിക്കാം.
ഇവന്റിന്റെ ഫുൾ വിഡിയോ കണ്ടു നോക്കുമ്പോൾ അത്തരത്തിലുള്ള ഒരു ഓഡിയൻസിന്റെ അപേക്ഷയോട് ചേച്ചി പ്രതികരിക്കുന്നതായി ഒരിടത്തും കാണാൻ സാധിക്കുന്നില്ല. പോട്ടെ ഇനി അങ്ങനെയൊരമ്മ ഇതുപോലെ അപേക്ഷിച്ചുവെന്നു തന്നെയിരിക്കട്ടെ. അങ്ങനെയാണെങ്കിൽ തന്നെ ഉർവശിച്ചേച്ചിക്ക് എന്നെ കൈ കാണിച്ചൊന്ന് വിളിച്ചാൽ മതിയായിരുന്നു. ഇതൊരു തമാശയായി മാത്രം കാണാൻ ഞാൻ ശ്രമിക്കുന്നുണ്ട്. പക്ഷേ എന്നോട് പറഞ്ഞ ടോണിന്റെ പ്രശ്നമാകാം അത് സാധിക്കുന്നില്ല.
പലടത്തു പലരും ചോദിച്ചിരുന്നു എന്തിനാണ് ഈ ഇവന്റിൽ ഇംഗ്ലിഷിൽ സംസാരിച്ചത് എന്ന് ചോദിക്കുന്നവരുണ്ട്. അതിന് കാരണങ്ങളുണ്ട്. ‘ആശ’ അഞ്ച് ഭാഷകളിലായി പാൻ ഇന്ത്യൻ റിലീസ് ചെയ്യുന്ന ചിത്രമാണ് എന്നതാണ് ഒന്ന്. ഇവന്റ് നടന്ന ലുലുമാളിൽ കേരളത്തിന് പുറത്തുനിന്നുള്ള ആളുകൾ വരുന്നതാണ്. അവർക്കുകൂടി സംഘാടകർ എന്നോട് ഇംഗ്ലിഷിലും മലയാളത്തിലുമായി സംസാരിക്കാനാണ് ആവശ്യപ്പെട്ടത്. അത് അനുസരിച്ചാണ് ഞാൻ അവതരിപ്പിച്ചത്.”
