കൊച്ചി: എറണാകുളം ജില്ലാ ജനറല്‍ ആശുപത്രിയിലെ ഡോക്ടര്‍മാര്‍ ഉള്‍പ്പെടെയുള്ള മുഴുവന്‍ ജീവനക്കാർക്കും ‘ലോക്ക് ഡൗണ്‍’ കഴിയുന്നതു വരെ ടി.ജെ. വിനോദ് എംഎല്‍എയുടെ നേതൃത്വത്തില്‍ രാത്രി ഭക്ഷണം എത്തിച്ചു നല്കും.
പദ്ധതിയുടെ ഉദ്ഘാടനം ആര്‍എംഒ ഡോ. പി.ജെ. സിറിയക്കിന് ഭക്ഷണപ്പൊതികള്‍ നല്‍കി എംഎല്‍എ നിര്‍വഹിച്ചു. ‘കരുതലായ് എറണാകുളം’ എന്ന എംഎല്‍എയുടെ സാമൂഹ്യ സുരക്ഷാ പദ്ധതിയുടെ ഭാഗമായാണ് 450 ഓളം വരുന്ന ജീവനക്കാര്‍ക്ക് എല്ലാ ദിവസവും ഭക്ഷണമെത്തിക്കുന്നത്.
രാവിലെയും വൈകുന്നേരവുള്ള ഷിഫ്റ്റുകളില്‍ ജോലി ചെയ്യുന്നവര്‍ക്ക് ഒരു പോലെ ഉപകാരപ്രദമാവുമെന്നതിനാലാണ് വൈകുന്നേരത്തെ ഭക്ഷണം എത്തിക്കുന്നതെന്ന് എംഎല്‍എ പറഞ്ഞു. നഗരസഭാ കൗണ്‍സിലര്‍ കെ.വി.പി. കൃഷ്ണകുമാര്‍, യൂണിടെക് ഗ്രൂപ്പ് മാനേജിംഗ് ഡയറക്ടര്‍ സന്തോഷ് ഈപ്പന്‍ തുടങ്ങിയവര്‍ പങ്കെടുത്തു.
