ചാത്തന്നൂർ: തിങ്കളാഴ്ചകൾ കേരള സ്റ്റേറ്റ് റോഡ് ട്രാൻസ്പോർട്ട് കോർപ്പറേഷന് നല്ല ദിവസമാകുന്നു. കഴിഞ്ഞ തിങ്കളാഴ്ച ടിക്കറ്റ് വരവിലൂടെ മാത്രം 9.41 കോടി നേടി.കെ എസ് ആർടിസിയുടെ ചരിത്രത്തിലെ ഏറ്റവും ഉയർന്ന രണ്ടാമത്തെ വരുമാന നേട്ടമാണ് ഒക്ടോബർ 6 തിങ്കളാഴ്ച നേടിയത്.
കഴിഞ്ഞസെപ്റ്റംബർ 8-ന് എക്കാലത്തെയും മികച്ച പ്രതിദിന ടിക്കറ്റ് വരുമാനമായ 10.19 കോടി കെഎസ്ആർടിസി നേടിയിരുന്നു.ഓണാവധി കഴിഞ്ഞ ആദ്യ തിങ്കളാഴ്ചയായിരുന്നു 10.19 കോടി നേടി ചരിത്രം സൃഷ്ടിച്ചത്. അന്ന് മറ്റ് വരുമാനങ്ങളിലൂടെ 85 ലക്ഷവും നേടി.1.57 കോടി രൂപയായിരുന്നു ഒറ്റ ദിവസത്തെ ലാഭം.
കാലോചിതമായ പരിഷ്ക്കരണ നടപടികളും, കെഎസ്ആർടിസി മാനേജ്മെന്റിന്റെ നേതൃത്വത്തിൽ നടത്തിയ തുടർ പ്രവർത്തനങ്ങളും ഈ വലിയ മുന്നേറ്റത്തിന് നിർണായകമായതായി കെ എസ് ആർടി സി.
പുതിയ ബസുകളുടെ വരവും, സേവനങ്ങളിൽ കൊണ്ടുവന്ന ഗുണപരമായ മാറ്റങ്ങളും യാത്രക്കാരിൽ വൻ സ്വീകാര്യത നേടിയിട്ടുണ്ട്.
കെഎസ്ആർടിസിയുടെ അഭിമാനകരമായ ഈ നേട്ടത്തിനായി, സമർപ്പിതമായി പ്രവർത്തിച്ച മുഴുവൻ ജീവനക്കാരോടും കെഎസ്ആർടിസിയോട് വിശ്വാസ്യത പുലർത്തിയ യാത്രക്കാരോടും, പിന്തുണ നൽകിയ തൊഴിലാളി സംഘടനകൾ അടക്കം ഓരോരുത്തരോടും കെഎസ്ആർടിസിയുടെ പേരിൽ നന്ദി അറിയിക്കുന്നതായി ചെയർമാൻ ആൻഡ് മാനേജിംഗ് ഡയറക്ടർ പ്രമോജ് ശങ്കർ പറഞ്ഞു.
- പ്രദീപ് ചാത്തന്നൂർ
