വർഷങ്ങളോളം ഒരു വീട്ടിൽ താമസിച്ചശേഷം പെട്ടെന്ന് ആ വീട് വിട്ട് മറ്റൊരിടത്തേക്ക് പോകുന്നത് എല്ലാവർക്കും പ്രയാസമുണ്ടാക്കുന്നൊരു കാര്യമാണ്. പ്രത്യേകിച്ച് വാടക്കകാർക്ക്. ആ വീടും ചുറ്റുപാടുകളും നാട്ടുകാരുമൊക്കെയായി പൊരുത്തപ്പെട്ടു വരുന്പോഴാകും വീട് ഒഴിഞ്ഞുകൊടുക്കേണ്ടി വരുന്നത്.
അത്രയും കാലം നമ്മൾ അവിടെ പരിചരിച്ചിരുന്ന ചെടികൾ, മുറികൾ, ഭക്ഷണം പാകം ചെയ്ത അടുക്കള എല്ലാം നമുക്ക് അപരിചിതമാകും. പുതിയ വീട്ടുകാർ വരുന്പോൾ നമ്മൾ നോക്കി നടത്തിയതെല്ലാം അവരും കൃത്യമായി ചെയ്യുന്നുണ്ടോ എന്നൊരു സംശയവും പേടിയും വിഷമവുമെല്ലാം നമുക്കുണ്ടാകും. അത്തരത്തിലൊരു സങ്കടത്തിന്റെ കാര്യമാണ് ഇപ്പോൾ സോഷ്യൽ മീഡിയയിൽ വൈറലാകുന്നത്.
പുതിയ വാടകക്കാരന് പഴയ താമസക്കാരൻ എഴുതിയ കത്താണിത്. താൻ ഇതിനു മുൻപ് അവിടെ താമസിച്ചുകൊണ്ടിരുന്നപ്പോൾ സ്ഥിരമായി രണ്ട് പ്രാവുകൾ എത്തിയിരുന്നു. അവർക്ക് അപകടം പറ്റിയ സമയത്ത് യുവാവ് ആയിരുന്നു രണ്ട് പ്രാവുകളേയും സംരക്ഷിച്ച് പുതു ജീവിതത്തിലേക്ക് എത്തിച്ചത്. അതിന്റെ നന്ദിയെന്നോണം ദിവസവും യുവാവിനെ കാണാൻ ആ പ്രാവുകൾ എത്തുമായിരുന്നു.
അവർക്ക് കഴിക്കാൻ ഭക്ഷണവും വെള്ളവും യുവാവ് നൽകിത്തുടങ്ങി. അങ്ങനെ പ്രാവുകളും യുവാവും തമ്മിൽ നല്ല ചങ്ങാത്തത്തിലുമായി. നെവ് എന്നും കാലോവ എന്നും അവയ്ക്ക് പേരുകളും നൽകി. എന്നാൽ പെട്ടെന്ന് യുവാവിനു വീട് വിട്ട് മറ്റൊരിടത്തേക്ക് താമസിക്കേണ്ടി വന്നു. പകരം പുതിയ താമസക്കാർ അങ്ങോട്ടേക്കും വന്നു. തന്റെ പ്രാവുകളെക്കുറിച്ച് പറയാനാണ് യുവാവ് പുതിയ താമസക്കാർക്ക് കത്ത് എഴുതിയത്.
കത്തിൽ യുവാവിനൊപ്പം പ്രാവുകളും നിൽക്കുന്ന ഫോട്ടോയും പേസ്റ്റ്ചെയ്ത് വച്ചിട്ടുണ്ടായിരുന്നു. സ്വീറ്റ്ഹാർട്ട് എന്നാണ് യുവാവ് പ്രാവുകളെ വിശേഷിപ്പിച്ചത്. മോ ഹാക്ക് എന്ന യൂസർ കത്തിന്റെ പകർപ്പ് സോഷ്യൽ മീഡിയയിൽ പങ്കുവച്ചു. ‘ഞാൻ ഈ അപ്പാർട്ടുമെന്റിൽ നിന്നും മാറുകയാണ്, പുതിയ വാടകക്കാർക്ക് ഞാൻ എഴുതിയിരിക്കുന്ന കത്ത് ഇതാ’ എന്ന ക്യാപ്ഷനോടെയാണ് പോസ്റ്റ് ഷെയർ ചെയ്തിരിക്കുന്നത്.
