കാസര്ഗോഡ്: അച്ഛനെയും പ്ലസ്ടു വിദ്യാര്ഥിനിയായ മകളെയും വാടകവീട്ടില് തൂങ്ങിമരിച്ച നിലയില് കണ്ടെത്തി. കര്ണാടക സ്വദേശിയും കാസര്ഗോഡ് മീപ്പുഗിരിയില് താമസക്കാരനുമായ ഗണേശന് (55), മകള് വൈഷ്ണവി (17) എന്നിവരാണു മരിച്ചത്. ചെമ്മനാട് കോളിയടുക്കം ശിവപുരം ക്ഷേത്രത്തിനു സമീപത്തെ ഇരുനില വാടകവീട്ടിലാണ് ഇരുവരെയും ഒരേ ഫാനിന്റെ ഹുക്കില് തൂങ്ങിമരിച്ച നിലയില് കണ്ടെത്തിയത്.
പരവനടുക്കം ജിഎച്ച്എസ്എസിലെ പ്ലസ്ടു സയന്സ് വിദ്യാര്ഥിനിയാണ് വൈഷ്ണവി. ഹോം നഴ്സായ കോഴിക്കോട് സ്വദേശിനി ഭാര്യ ഓമന ജോലിസ്ഥലത്തും മകന് വിഷ്ണു കാറ്ററിംഗ് ജോലിക്കും പോയ സമയത്തായിരുന്നു സംഭവം. ശനിയാഴ്ച രാത്രി 11.10 ന് ഗണേശന് അയല്വീട്ടിലെത്തി മകളെ കാണാനില്ലെന്ന് അറിയിച്ചു.
എന്നാല്, വീട്ടിലേക്കു തിരികെപ്പോയ ഗണേശന് വാതില് ഉച്ചത്തില് കൊട്ടിയടച്ചതില് സംശയം തോന്നിയ അയല്വാസികള് മേല്പറമ്പ് പോലീസില് വിവരമറിയിക്കുകയായിരുന്നു. പോലീസെത്തി അകത്തുനിന്നു പൂട്ടിയ വാതില് ബലംപ്രയോഗിച്ച് തുറന്നു പരിശോധിച്ചപ്പോഴാണ് ഇരുവരെയും മരിച്ചനിലയില് കണ്ടെത്തിയത്.
വിഷ്ണുപ്രിയയാണ് ഗണേശന്റെ മറ്റൊരു മകള്. ഏതാനും മാസങ്ങള്ക്ക് മുന്പാണ് ഗണേശനും കുടുംബവും ശിവപുരത്തെ വാടകവീട്ടിലേക്കു താമസം മാറിയത്. ആത്മഹത്യയുടെ കാരണം വ്യക്തമായിട്ടില്ല. മേല്പറമ്പ് പോലീസ് കേസെടുത്ത് അന്വേഷണമാരംഭിച്ചു. അതേസമയം ഇതേ വാടകവീട്ടില് മുമ്പും രണ്ടുപേര് ജീവനൊടുക്കിയിരുന്നതായി പോലീസ് വ്യക്തമാക്കി. 2025 ഓഗസ്റ്റ് 13ന് ഒരു യുവാവും മൂന്നു മാസങ്ങള്ക്ക് ശേഷം ഇയാളുടെ പിതാവും ഇതേവീട്ടില് ആത്മഹത്യ ചെയ്തിരുന്നു.
