ട്രെയിൻ സ്റ്റോപ്പില്ലാത്തതിനാൽ നിർത്തിയിടാത്ത ഓടുന്ന ട്രെയിനിലെ യാത്രക്കാരന് യുവാവ് ഭക്ഷണ പാർസൽ കൈമാറിയത് വ്യത്യസ്ഥമായി രീതിയിൽ.
സമയകൃത്യതയും ബുദ്ധിയും സമന്വയിപ്പിച്ചുള്ള ഈ സാഹസിക കൈമാറ്റത്തിന്റെ വീഡിയോ ഇപ്പോൾ സോഷ്യൽ മീഡിയയിൽ വൈറലാവുകയാണ്. ‘എക്സ്’ ഉപയോക്താവായ ആയിഷ മജിദ് ഖാനാണ് ഈ രസകരമായ വീഡിയോ പങ്കുവെച്ചത്.
റെയിൽവേ ട്രാക്കിന് സമീപം പാർസലുമായി കാത്തുനിൽക്കുന്ന യുവാവിലാണ് വീഡിയോ ആരംഭിക്കുന്നത്. ട്രെയിൻ കടന്നുപോകുമ്പോൾ ഓരോ കമ്പാർട്ട്മെന്റിലെയും വാതിലുകൾ ശ്രദ്ധയോടെ നിരീക്ഷിക്കുന്നു, എന്നാൽ ഫോൺ വഴി മുൻകൂട്ടി പ്ലാൻ ചെയ്ത പ്രകാരമായിരുന്നു ഈ കൈമാറ്റം.
ഒരു ബോഗിയിൽ നിന്ന് യാത്രക്കാരൻ കൈവീശി കാണിച്ചതോടെ, ട്രെയിൻ ഒപ്പമെത്തിയ നിമിഷത്തിൽ യുവാവ് കൃത്യമായി പാർസൽ എറിഞ്ഞുകൊടുക്കുകയും യാത്രക്കാരൻ അത് സുരക്ഷിതമായി പിടിച്ചെടുക്കുകയും ചെയ്തു. നിമിഷങ്ങൾക്കുള്ളിലാണ് ഈ സാഹസിക കൈമാറ്റം നടന്നത്.
യുവാവിന്റെ പെട്ടെന്നുള്ള ചിന്തയും പാഴ്സൽ എറിഞ്ഞു നൽകിയ സമയകൃത്യതയും നെറ്റിസൺസിന്റെ പ്രശംസ പിടിച്ചുപറ്റി. മനുഷ്യർക്ക് ധാരാളം ബുദ്ധിയുണ്ടെന്നും എന്നാൽ അത് ശരിയായ കാര്യങ്ങൾക്ക് ഉപയോഗിക്കുമ്പോഴാണ് അതിശയം തോന്നുന്നതെന്നും ഉപയോക്താക്കൾ കമന്റ് ചെയ്തു.
ഒപ്പമുണ്ടായിരുന്ന മുതിർന്നയാൾ സ്വന്തമായി ഇത് ചെയ്യാൻ ധൈര്യപ്പെടാത്തതുകൊണ്ട് യുവാവിനെക്കൊണ്ട് ചെയ്യിച്ചതാണെന്ന തരത്തിലുള്ള തമാശ കമന്റുകളും പോസ്റ്റിന് താഴെയുണ്ട്. വളരെ കുറച്ചു സെക്കൻഡുകൾ മാത്രം നീണ്ടുനിന്ന ഈ കൈമാറ്റം വൻ കൈയടിയാണ് ഇൻ്റർനെറ്റിൽ നേടുന്നത്.
