കോഴിക്കോട്: മാവോയിസ്റ്റ് ബന്ധം ആരോപിച്ചു കസ്റ്റഡിയിലെടുത്ത കോഴിക്കോട് സ്വദേശികളായ അലൻ ഷുഹൈബ്, താഹ ഫസൽ എന്നിവർക്കു വേണ്ടി യുഡിഎഫ് ഇടപെടുന്നു. ഇരുവർക്കുമെതിരെ യുഎപിഎ കേസ് ചുമത്തിയതിനെതിരെയാണ് ഇടപെടൽ.
വിഷയത്തിൽ മുന്നണിതലത്തിൽ ഇടപെടുമെന്നു പ്രതിപക്ഷ ഉപനേതാവ് എം.കെ. മുനീർ അറിയിച്ചു. അന്തിമതീരുമാനം ഘടകകക്ഷികളുമായി ആലോചിച്ചശേഷമുണ്ടാകും. പ്രതിപക്ഷനേതാവ് ചൊവ്വാഴ്ച അലൻ, താഹ എന്നിവരുടെ വീടുകൾ സന്ദർശിക്കും. യുഎപിഎ ചുമത്താനുണ്ടായ സാഹചര്യം മുഖ്യമന്ത്രി വിശദീകരിക്കണമെന്നും മുനീർ ആവശ്യപ്പെട്ടു.
അറസ്റ്റിലായ താഹയുടെയും അലന്‍റെയും വീടുകൾ സന്ദർശിച്ച ശേഷമാണു മുനീർ ഇക്കാര്യം വ്യക്തമാക്കിയത്. അലനും താഹയും മാവോയിസ്റ്റ് പ്രവർത്തകർ തന്നെയാണെന്ന നിലപാടിൽ മുഖ്യമന്ത്രിയും സിപിഎമ്മും ഉറച്ചുനിൽക്കുന്ന സാഹചര്യത്തിലാണു വിഷയം രാഷ്ട്രീയമായി ഏറ്റെടുക്കാൻ യുഡിഎഫ് രംഗത്തെത്തുന്നത്.
