രാജാക്കാട്: രാജാക്കാടിന് സമീപം കൊച്ചുമുല്ലക്കാനത്ത് ഓട്ടോറിക്ഷ സാമൂഹ്യവിരുദ്ധർ തീയിട്ട് നശിപ്പിച്ചു. ചൂഴിക്കരയിൽ രാജേഷിന്റെ ഓട്ടോ റിക്ഷയാണ് ചൊവ്വാഴ്ച രാത്രിയിൽ സാമൂഹ്യ വിരുദ്ധർ തീയിട്ട് നശിപ്പിച്ചത്.
സ്വന്തം വീട്ടിലേക്ക് ഓട്ടോറിക്ഷ കൊണ്ടുപോകാൻ റോഡ് ഇല്ലാത്തതിനാൽ രാത്രിയിൽ അയൽപക്കത്തെ വീട്ടുമുറ്റത്താണ് പാർക്കുചെയ്യാറുള്ളത്.
ഇതിന് മുൻപ് രണ്ട് പ്രാവശ്യം ഇതേ സ്ഥലത്ത് രാജേഷിന്റെ ഓട്ടോറിക്ഷ തീയിട്ട് നശിപ്പിച്ചിരുന്നു.
അതു സംബന്ധിച്ചുള്ള പരാതിയിൽ പോലീസ് അന്വേഷണം നടന്നുവരികയാണ്. ഇതിനിടയിലാണ് മൂന്നാമതും രാജേഷിന്റെ ഓട്ടോ വീണ്ടും കത്തിച്ചത്.
സിസിടിവി ദൃശ്യങ്ങളുടെയും സാഹചര്യത്തെളിവുകളുടെയും അടിസ്ഥാനത്തിൽ രാജാക്കാട് എസ്എച്ച്ഒ വി. വിനോദ്കുമാറിന്റെ നേതൃത്വത്തിലുള്ള പോലീസ് പ്രതിക്കായുള്ള അന്വേഷണം ശക്തമാക്കി.
