ലണ്ടൻ: ബാലൺ ഡി ഓർ 2026 പുരസ്‌കാരച്ചടങ്ങിൽ തിളങ്ങി ബാഴ്‌സലോണ താരങ്ങൾ. കഴിഞ്ഞ സീസണിലെ മികച്ച ലോക ഫുട്ബോൾ താരത്തിനുള്ള ബാലൺ ഡി ഓർ പുരസ്‌കാരം ഇംഗ്ലീഷ് താരം ഹാരി കെയ്ൻ സ്വന്തമാക്കി. വനിതാ വിഭാഗത്തിൽ സ്പാനിഷ് താരവും ബാഴ്‌സലോണയുടെ മുൻനിര താരവുമായ അലക്സിയ പുട്ടെയാസ് മികച്ച താരമായി തെരഞ്ഞെടുക്കപ്പെട്ടു.
ബാഴ്‌സലോണയ്ക്കായുള്ള മികച്ച പ്രകടനമാണ് പുട്ടെയാസിന് നേട്ടമായത്.മികച്ച യുവതാരത്തിനുള്ള കോപ്പ ട്രോഫി പുരുഷ വിഭാഗത്തിൽ ലാമിൻ യമാലും വനിതാ വിഭാഗത്തിൽ വിക്കി ലോപ്പസും നേടി. 21 വയസിൽ താഴെയുള്ള താരങ്ങൾക്കുള്ള പുരസ്‌കാരം തുടർച്ചയായ മൂന്നാം തവണയാണ് 19കാരനായ യമാൽ സ്വന്തമാക്കിയത്. 2025ലും വനിതാ വിഭാഗത്തിലെ കോപ്പ ട്രോഫി നേടിയ വിക്കി ലോപ്പസ് തുടർച്ചയായ രണ്ടാം തവണയാണ് പുരസ്‌കാരത്തിന് അർഹയായത്.
മികച്ച പുരുഷ പരിശീലകനുള്ള പുരസ്‌കാരം സ്പെയിൻ ദേശീയ ടീമിന്‍റെ പരിശീലകൻ ലൂയിസ് ഡി ലാ ഫുവെന്‍റെ സ്വന്തമാക്കി. മികച്ച വനിതാ പരിശീലകനായി സ്പാനിഷ് പരിശീലകൻ പെരെ റൊമേയു തെരഞ്ഞെടുക്കപ്പെട്ടു. മികച്ച പുരുഷ ഗോൾകീപ്പർക്കുള്ള പുരസ്‌കാരം സ്പെയിൻ താരം ഉനായ് സിമോണും വനിതാ ഗോൾകീപ്പർക്കുള്ള പുരസ്‌കാരം കാറ്റാ കോളും നേടി.
മികച്ച ക്ലബ്ബിനുള്ള പുരസ്‌കാരം പുരുഷ വിഭാഗത്തിൽ ഫ്രഞ്ച് ക്ലബായ പിഎസ്ജി സ്വന്തമാക്കിയപ്പോൾ വനിതാ വിഭാഗത്തിൽ ബാഴ്‌സലോണ ജേതാക്കളായി. മികച്ച പുരുഷ സ്‌ട്രൈക്കർക്കുള്ള പുരസ്‌കാരം ഇംഗ്ലീഷ് താരം ഹാരി കെയ്‌നും വനിതാ സ്‌ട്രൈക്കർക്കുള്ള പുരസ്‌കാരം മെക്‌സിക്കൻ താരം വെറോണിക്ക ചാർലിൻ കൊറാലിനും ലഭിച്ചു.
ഇന്ത്യൻ സമയം ചൊവ്വാഴ്ച പുലർച്ചെയായിരുന്നു ലണ്ടനിൽ പുരസ്‌കാരച്ചടങ്ങ് നടന്നത്. ചരിത്രത്തിൽ ആദ്യമായാണ് ഫ്രാൻസിന് പുറത്തൊരു വേദി ചടങ്ങിന് ആതിഥേയത്വം വഹിക്കുന്നത്. ലണ്ടനിലെ പ്രശസ്തമായ ലണ്ടൻ പാലാഡിയം തീയറ്ററാണ് ഇത്തവണ പുരസ്‌കാര പ്രഖ്യാപനങ്ങൾക്ക് വേദിയായത്. 1956-ൽ ആദ്യ ബാലൺ ഡി ഓർ നേടിയ ഇംഗ്ലീഷ് ഫുട്ബോൾ ഇതിഹാസം സർ സ്റ്റാൻലി മാത്യൂസിനോടുള്ള ആദരസൂചകമായാണ് ചടങ്ങ് ലണ്ടനിലേക്ക് മാറ്റിയത്.
പുരുഷ, വനിതാ വിഭാഗങ്ങളിലെ ബാലൺ ഡി ഓർ പുരസ്‌കാരങ്ങൾക്ക് പുറമെ മികച്ച യുവതാരങ്ങൾക്കുള്ള കോപ്പ ട്രോഫി, മികച്ച ഗോൾകീപ്പർമാർക്കുള്ള യാഷിൻ ട്രോഫി, മികച്ച പരിശീലകർക്കും ക്ലബുകൾക്കുമുള്ള അംഗീകാരങ്ങൾ, മികച്ച സ്‌ട്രൈക്കർക്കുള്ള ഗെർഡ് മുള്ളർ ട്രോഫി, ജീവകാരുണ്യ പ്രവർത്തനങ്ങളെ ആദരിക്കുന്ന സോക്രട്ടീസ് അവാർഡ് എന്നിവയുൾപ്പെടെ 13 പുരസ്‌കാരങ്ങളാണ് ചടങ്ങിൽ വിതരണം ചെയ്യുന്നത്.
