നമ്മൾ വരുത്തുന്ന ചെറിയ കൈപ്പിഴകൾ ചിലപ്പോൾ വലിയ അബദ്ധങ്ങളിലേക്ക് ചെന്നെത്താറുണ്ട്. അത്തരമൊരു വാർത്തയാണ് ഇപ്പോൾ സോഷ്യൽ മീഡിയയിൽ കൗതുകമുണർത്തുന്നത്. ചൈനയിലെ ഗാൻസു പ്രവിശ്യയിലുള്ള ലാൻഷൗവിലാണ് സംഭവം.
വാംഗ് എന്ന് പേരുള്ള യുവതി രാത്രി കുളികഴിഞ്ഞ് തന്റെ വീട്ടിലെ സോളാർ വാട്ടർ ഹീറ്ററിന്റെ ടാപ്പ് അടയ്ക്കാൻ മറന്നുപോയി. അതോടെ വെള്ളം പുറത്തേക്ക് ഒഴുകാൻ തുടങ്ങി. ഏകദേശം ഒമ്പത് മണിക്കൂറോളമാണ് ടെറസിലെ ടാങ്കിൽ നിന്നും വെള്ളം തുടർച്ചയായി പുറത്തേക്ക് ഒഴുകിയത്.
അന്നേ ദിവസം ലാൻഷൗവിൽ താപനില മൈനസ് 8 ഡിഗ്രി സെൽഷ്യസിലേക്ക് താഴ്ന്നിരിക്കുകയായിരുന്നു. കെട്ടിടത്തിന്റെ മുകളിൽ നിന്നും താഴേക്ക് ഒഴുകിയ വെള്ളം കഠിനമായ തണുപ്പിൽ പെട്ടെന്നുതന്നെ ഉറയുകയും ഐസ് ആയി മാറുകയും ചെയ്തു.
എക്സസൈസ് ചെയ്യാനായി രാവിലെ യുവതിയുടെ പിതാവ് എഴുന്നേറ്റപ്പോൾ മുറ്റവും റോഡും നിറയെ ഐസ് മൂടിക്കിടക്കുന്നത് കണ്ടു. ആരോ പൈപ്പ് തുറന്ന് വിട്ടതാണെന്ന് ബോധ്യപ്പെട്ട പിതാവ് ആരാണ് ഇത് ചെയ്തത് എന്ന് അന്വേഷിച്ച് ഇറങ്ങിയപ്പോഴാണ് തന്റെ വീട്ടിൽ നിന്നാണ് വെള്ളം പോയതെന്ന മനസിലാക്കിയത്.
ഉടൻതന്നെ അദ്ദേഹം മറ്റുള്ള കുടുംബാംഗങ്ങളെക്കൂടി വിളിച്ച് ഉണർത്തി. ഐസ് വേഗത്തിൽ ഉരുക്കിക്കളയാനായി അദ്ദേഹത്തിന്റെ ഭാര്യ അടുത്തുള്ള കടകളിലെ ഉപ്പ് മുഴുവൻ വാങ്ങി റോഡിൽ വിതറി. വാഗും പിതാവും അപ്പാർട്ട്മെന്റിലെ ജീവനക്കാരും ചേർന്ന് ഐസ് നീക്കം ചെയ്യാനും തുടങ്ങി. ഭാഗ്യവശാൽ ആർക്കും പരിക്കുകൾ ഒന്നും സംഭവിച്ചില്ല.
