കോട്ടയം: ഇന്ത്യന് ഭരണഘടന പൗരന് ഉറപ്പു നല്കുന്ന മതസ്വാതന്ത്ര്യത്തിന്റെയും മൗലികാവകാശങ്ങളുടെയും നഗ്നമായ ലംഘനമാണ് വിശുദ്ധ വാരത്തില് ദേശീയ എന്ജിനിയറിംഗ് പ്രവേശന പരീക്ഷ നടത്താന് പരീക്ഷാ ഏജന്സിക്ക് അനുവാദം നല്കിയിരിക്കുന്നതിലൂടെ കേന്ദ്രസര്ക്കാര് ചെയ്യുന്നത്. ഭരണഘടന പൗരന് നല്കുന്ന ഉറപ്പായ അവകാശങ്ങള് ഭരണനേതൃത്വം വളഞ്ഞ വഴിയിലൂടെ ലംഘിക്കുകയാണെന്നും കത്തോലിക്ക കോണ്ഗ്രസ് ചങ്ങനാശേരി അതിരൂപതാ സമിതി ആരോപിച്ചു.
കത്തോലിക്ക കോണ്ഗ്രസ് ചങ്ങനാശേരി അതിരൂപതാ സമിതി എന്ജിനിയറിംഗ് പ്രവേശന പരീക്ഷകള് വിശുദ്ധവാരത്തിലെ പെസഹാവ്യാഴം, ദുഃഖശനി, ഈസ്റ്റര് ദിനങ്ങളില് നടത്തുന്നതില് പ്രതിഷേധിച്ച് കോട്ടയം ഗാന്ധി സ്ക്വയറില് സംഘടിപ്പിച്ച പ്രതിഷേധ സായാഹ്ന ധര്ണയിലാണ് സംഘടന നിലപാട് അറിയിച്ചത്.
അതിരൂപതാ പ്രസിഡന്റ് ബിജു സെബാസ്റ്റ്യന് അധ്യക്ഷത വഹിച്ചു. പ്രതിഷേധ സായാഹ്ന ധര്ണ സീറോമലബാര് പബ്ലിക് അഫയേഴ്സ് കമ്മീഷന് സെക്രട്ടറി ഫാ. ജയിംസ് കൊക്കാവയലില് ഉദ്ഘാടനം ചെയ്തു.
അതിരൂപതാ ഡയറക്ടര് റവ.ഡോ. സാവിയോ മാനാട്ട്, ലൂര്ദ് ഫൊറോനാ വികാരി റവ.ഡോ. ജേക്കബ് വട്ടയ്ക്കാട്ട്, ജനറല് സെക്രട്ടറി ബിനു ഡൊമിനിക്, വൈസ് പ്രസിഡന്റുമാരായ ജോര്ജ്കുട്ടി മുക്കത്ത്, റോസ്ലിന് കുരുവിള, ഗ്ലോബല് ഭാരവാഹികളായ രാജേഷ് ജോണ്, മനു ജെ. വരാപ്പള്ളി, ലിസി ജോസ്, അതിരൂപത ഭാരവാഹികളായ കുഞ്ഞ് കളപ്പുര, കെ.എസ്. ആന്റണി, സെബാസ്റ്റ്യന് വര്ഗീസ്, സൈബി അക്കര, സെബാസ്റ്റ്യന് പുല്ലാട്ടുകാലാ, സേവ്യര് തോമസ് കൊണ്ടോടി, ജോബി ചൂരക്കളം, സിസി അമ്പാട്ട്, ജോസി ഡൊമിനിക്, ജോയി പാറപ്പുറം, പി.പി. ജോസഫ്, ലാലി ഇളപ്പുങ്കല്, ഇ.ജെ. തോമസ് ഇടത്താഴെ, ചെറിയാന് പാലത്തുങ്കല് എന്നിവര് പ്രസംഗിച്ചു.
