നമ്മുടെ വിജയങ്ങളിൽ മാതാപിതാക്കളോളം സന്തോഷിക്കുന്ന മറ്റാരും തന്നെ ഈ ലോകത്തില്ല. മക്കൾ എത്രത്തോളം ഉയരത്തിലെത്താമോ അത്രയും പറക്കുന്നത് കാണാൻ കൊതിക്കുന്ന അച്ഛനമ്മമാരാണ് എല്ലാവരും. ആകാശംമുട്ടെ പറന്നൊരു മകന്റെ വിജയത്തിൽ അഭിമാനിക്കുന്ന മാതാപിതാക്കളുടെ വീഡിയോ ആണിപ്പോൾ സോഷ്യൽ മീഡിയയിൽ വൈറലാകുന്നത്.
കാര്യം മറ്റൊന്നുമല്ല ഇൻഡിഗോ വിമാനത്തിൽ മകന്റെ ഫ്ലൈയിംഗ് ലൈവ് കണ്ട് മനസ് നിറയ്ക്കാൻ എത്തിയതാണ് മാതാപിതാക്കൾ. പൈലറ്റ് അവിരാൾ പ്രഖാറ് ആണ് നമ്മുടെ ഹീറോ. അദ്ദേഹമാണ് തന്റെ മാതാപിതാക്കളെയും കൊണ്ട് ആകാശം നീളെ പറക്കാൻ പോകുന്നത്. അച്ഛനമ്മമാരുടെ ആദ്യ പ്ലെയിൻ യാത്ര എന്നാൽ മകൻ പറത്തട്ടെ, അല്ലേ! പൈലറ്റ് എന്ന നിലയിൽ മാതാപിതാക്കളെക്കൊണ്ടുള്ള ആദ്യ യാത്രയെന്നാണ് ഇതിനെ അവിരാൾ വിശേഷിപ്പിച്ചത്.
അച്ഛനും അമ്മയും വിമാനത്തിനുള്ളിലേക്ക് കയറുന്പോൾ അവരെ സ്വാഗതം ചെയ്യുന്ന അവിരാളിനെ നമുക്ക് വീഡിയോയിൽ കാണാൻ സാധിക്കും. മാതാപിതാക്കൾ അകത്തേക്ക് കയറിയപ്പോൾ ഇരുവരുടേയും കാൽ തൊട്ട് അനുഗ്രഹം വാങ്ങുകയായിരുന്നു ആദ്യം അവിരാൾ ചെയ്തത്. മകനെ ശിരസിൽ തഴുകി അനുഗ്രഹം നൽകി അമ്മ അവനെ ആലിംഗനം ചെയ്തു. അഭിമാനത്തോടെ മകനെ ചേർത്ത് പിടിച്ച് കണ്ണു നിറച്ച് അച്ഛനും മറുതലയ്ക്കൽ നിന്നതോടെ ആ കാഴ്ച കണ്ടു നിന്നവരുടെ എല്ലാം കണ്ണും മനസും ഒരുപോലെ നിറച്ചു.
വീഡിയോ വൈറലായതോടെ നിരവധി ആളുകളാണ് കമന്റുമായി എത്തിയത്. അഭിമാനം വാനോളം എന്നാണ് വീഡിയോ കണ്ട് പലരും കമന്റ് ചെയ്തത്. അവൻ പറത്തിയ വിമാനം നീങ്ങുന്ന ആകാശത്തേക്കാൾ വലുതാണ് ആ അച്ഛന്റേയും അമ്മയുടേയും സന്തോഷവും അഭിമാനവും എന്ന് മറ്റു ചിലരും അഭിപ്രായപ്പെട്ടു.
