കൊല്ലം: പത്തനാപുരത്ത് കാട്ടാന ചരിഞ്ഞത് ആനയുടെ ജനനേന്ദ്രിയത്തിൽ പ്രത്യേക തരം ഈച്ച കുത്തിയതിൽ നിന്നും ഉണ്ടായ രോഗത്താലാണെന്ന് പോസ്റ്റ് മോർട്ടം പ്രാഥമിക റിപ്പോർട്ട്.
പൂർണമായ പോസ്റ്റ്മോർട്ടം റിപ്പോർട്ട് കിട്ടിയെങ്കിൽ മാത്രമേ കൂടുതൽ വിവരങ്ങൾ അറിയാൻ സാധിക്കൂവെന്ന് പത്തനാപുരം റേഞ്ച് ഓഫീസർ ബി ആർ ജയൻ, ഡെപ്യൂട്ടി റേഞ്ച് ഓഫീസർ എ നിസാം എന്നിവർ പറഞ്ഞു. അതിനുശേഷം കൂടുതൽ അന്വേഷണവുമുണ്ടാകും.
കുമരംകുടി വനമേഖലയിൽ ചരിഞ്ഞ നിലയിൽ കണ്ടെത്തിയ കാട്ടാനയുടെ ജഡം മറവ് ചെയ്തു. ഏകദേശം 25 വയസ് പ്രായം തോന്നിക്കുന്ന പിടിയാനയാണ് കുമരംകുടി ഫാമിംഗ് കോർപ്പറേഷനോട് ചേർന്നുള്ള വനത്തിലെ അരുവിക്ക് സമീപം ചരിഞ്ഞത്. കഴിഞ്ഞ ദിവസം വൈകുന്നേരത്തോടെ വനപാലകരുടെ സംഘമാണ് ആനയെ കണ്ടെത്തിയത്.