ടെൽ അവീവ്: ഇസ്രയേൽ തെരഞ്ഞെടുപ്പിൽ അറബ് പാർട്ടികൾ മുന്നേറ്റമുണ്ടാക്കിയതിനു പിന്നാലെ ഖത്തറിനെതിരെ ആരോപണങ്ങളുമായി പ്രധാനമന്ത്രി ബെഞ്ചമിൻ നെതന്യാഹു. തെരഞ്ഞെടുപ്പിന് ദിവസങ്ങൾക്കുമുൻപ് അറബ് പാർട്ടി നേതാക്കൾ ഖത്തർ സന്ദർശിച്ചതാണ് വിവാദത്തിന് വഴിവെച്ചത്. സന്ദർശനത്തിന്‍റെ ലക്ഷ്യം ചോദ്യംചെയ്ത് നെതന്യാഹുവും അനുയായികളും രംഗത്തെത്തിയപ്പോൾ ആരോപണങ്ങൾ ഖത്തർ തള്ളി.
വ്യക്തമായ ഭൂരിപക്ഷമില്ലാത്ത തെരഞ്ഞെടുപ്പ് ഫലവും അറബ് പാർട്ടികളുടെ മുന്നേറ്റവുമാണ് ഇസ്രയേൽ രാഷ്ട്രീയത്തിൽ പ്രധാന ചർച്ചാവിഷയമായിരിക്കുന്നത്. വോട്ടെണ്ണൽ പൂർത്തിയാകുന്നതിനുമുൻപുതന്നെ തെരഞ്ഞെടുപ്പ് ഫലം അട്ടിമറിക്കപ്പെട്ടെന്ന തരത്തിലുള്ള പ്രചാരണങ്ങൾ ആരംഭിച്ചിരുന്നു. അറബ് പാർട്ടി നേതാവ് അഹ്മദ് തൈബി തെരഞ്ഞെടുപ്പിന് നാലുദിവസം മുമ്പ് ഖത്തർ സന്ദർശിച്ചതും ആരോപണങ്ങൾക്ക് ആക്കംകൂട്ടി.
എന്നാൽ ഇസ്രയേൽ തെരഞ്ഞെടുപ്പിൽ ഇടപെടുകയോ രാഷ്ട്രീയ പാർട്ടികൾക്ക് ഫണ്ട് നൽകുകയോ ചെയ്തിട്ടില്ലെന്ന് ഖത്തർ വ്യക്തമാക്കി. ഖത്തറിനെ ലക്ഷ്യമിട്ട് സംഘടിതമായ വ്യാജപ്രചാരണം നടത്തുകയാണെന്ന് ഖത്തർ പ്രധാനമന്ത്രിയുടെ ഉപദേഷ്ടാവ് ഡോ. മാജിദ് അൽ അൻസാരി ആരോപിച്ചു. ഇത്തരം പ്രചാരണങ്ങൾ വിഡ്ഢിത്തവും അപകടകരവുമാണെന്നും അദ്ദേഹം തിരിച്ചടിച്ചു. മേഖലയിൽ സമാധാന ദൗത്യങ്ങൾക്കായി പ്രവർത്തിക്കുന്ന ഖത്തറിനെ ഇത്തരം ആരോപണങ്ങൾ പിന്തിരിപ്പിക്കില്ലെന്നും അൽ അൻസാരി വ്യക്തമാക്കി.
സസ്പെൻസ് നീളുന്നു, ആർക്കും കേവല ഭൂരിപക്ഷമില്ല
ടെൽ അവീവ്: ഇസ്രയേൽ പാർലമെന്‍റ് തെരഞ്ഞെടുപ്പിന്‍റെ ഫലം പുറത്തുവരുമ്പോൾ ഭരണകക്ഷിയായ ബെഞ്ചമിൻ നെതന്യാഹുവിന്‍റെ സഖ്യത്തിന് തിരിച്ചടി. 120 അംഗങ്ങളുള്ള ക്നെസറ്റിൽ കേവല ഭൂരിപക്ഷത്തിന് 61 സീറ്റുകൾ വേണമെന്നിരിക്കെ, 90 ശതമാനം വോട്ടുകൾ എണ്ണിത്തീരുമ്പോൾ നെതന്യാഹുവിന്‍റെ ലികുഡ് പാർട്ടി നയിക്കുന്ന വലതുപക്ഷ മുന്നണിക്ക് 53 സീറ്റുകൾ മാത്രമാണ് നേടാനായത്.
മുൻ സൈനിക മേധാവി ഗാഡി ഐസൻകോട്ടിന്‍റെ ‘യാഷർ’ പാർട്ടി നയിക്കുന്ന പ്രതിപക്ഷ സഖ്യം 48 സീറ്റുകൾ നേടി. അതേസമയം, 19 സീറ്റുകൾ സ്വന്തമാക്കിയ അറബ് പാർട്ടികളുടെ സഖ്യം (ജോയിന്‍റ് ലിസ്റ്റും റെആം പാർട്ടിയും) ഇത്തവണ രാഷ്ട്രീയമായി നിർണായക ശക്തിയായി മാറി.
കേവലഭൂരിപക്ഷത്തിന് ആവശ്യമായ 61 സീറ്റുകൾ ആർക്കും ലഭിക്കാത്ത സാഹചര്യത്തിൽ ഇസ്രയേലിൽ വീണ്ടുമൊരു രാഷ്ട്രീയ അനിശ്ചിതത്വത്തിനും ഭരണപ്രതിസന്ധിക്കും വഴിയൊരുങ്ങിയിരിക്കുകയാണ്. ബെഞ്ചമിൻ നെതന്യാഹുവിന്‍റെ ലികുഡ് പാർട്ടി 27 സീറ്റുകൾ നേടി ഏറ്റവും വലിയ ഒറ്റക്കക്ഷിയായെങ്കിലും മുൻപുണ്ടായിരുന്ന ഭൂരിപക്ഷം നിലനിർത്താനായില്ല.
ഇസ്രയേൽ ജനസംഖ്യയുടെ അഞ്ചിലൊന്ന് വരുന്ന അറബ് വിഭാഗത്തെ പ്രതിനിധീകരിക്കുന്ന ജോയിന്‍റ് ലിസ്റ്റും റെആമും ചേർന്ന് 19 സീറ്റുകൾ നേടി മികച്ച നേട്ടമുണ്ടാക്കി. പ്രതിപക്ഷത്തിന് സർക്കാരുണ്ടാക്കണമെങ്കിൽ അറബ് പാർട്ടികളുടെ പിന്തുണ അത്യാവശ്യമാണ്.വീണ്ടുമൊരു പൊതുതെരഞ്ഞെടുപ്പ് ഒഴിവാക്കാൻ പാർട്ടികൾ വിട്ടുവീഴ്ചയ്ക്ക് തയ്യാറാകണമെന്ന് പ്രസിഡന്‍റ് ഐസക് ഹെർസോഗ് അഭ്യർത്ഥിച്ചു. നേതാക്കളുമായി കൂടിയാലോചിച്ച ശേഷം സർക്കാരുണ്ടാക്കാൻ കൂടുതൽ സാധ്യതയുള്ള വ്യക്തിയെ അദ്ദേഹം ക്ഷണിക്കും.
