ദുബായ്: ഐസിസി ഏകദിന റാങ്കിംഗിൽ ഇന്ത്യൻ ഓപ്പണർ രോഹിത് ശർമ അഞ്ചാം സ്ഥാനത്ത്. രോഹിത് നയിച്ച ടീം 2-1 ന് ശ്രീലങ്കക്കെതിരായ ഏകദിന പരന്പര നേടിയതോടെ 800 പോയിന്റ് ക്രോസ് ചെയ്ത താരം രണ്ടു സ്ഥാനങ്ങൾ ഉയർന്ന് അഞ്ചിലെത്തുകയായിരുന്നു.
കഴിഞ്ഞ ഫെബ്രുവരിയിൽ മൂന്നാം റാങ്കിലെത്തിയിരുന്ന രോഹിതിന്റെ സ്ഥാനം പിന്നീട് താഴുകയായിരുന്നു. മോഹാലിയിൽ ലങ്കയ്ക്കെതിരേ ഇരട്ടസെഞ്ചുറി (208) നേടിയ രോഹിത് ഇന്ത്യയുടെ പരന്പരവിജയത്തിൽ നിർണായകപങ്കാണ് വഹിച്ചത്.
ലങ്കയ്ക്കെതിരായ പരന്പരയിൽ മികച്ച പ്രകടനം കാഴ്ചവച്ച ഇന്ത്യൻ ഓപ്പണർ ശിഖർ ധവാൻ പതിന്നാലാം റാങ്കിലെത്തി. ബൗളർമാരിൽ ലെഗ് സ്പിന്നർ യുസ്വേന്ദ്ര ചാഹൽ 28-ാം റാങ്കിലാണ്. കുൽദീപ് യാദവ് തന്‍റെ കരിയർ ബെസ്റ്റ് ആയ 56-ാം റാങ്കിലെത്തി.
