പേരൂര്ക്കട: നഷ്ടപ്പെട്ടുപോയ 40-ഓളം സ്മാര്ട്ട് ഫോണുകള് കണ്ടെത്തി ഉടമസ്ഥര്ക്കു നല്കി ഫോര്ട്ട് പോലീസ്. ഏകദേശം 15 ലക്ഷം രൂപ വിലമതിക്കുന്ന സ്മാര്ട്ട് ഫോണുകളാണ് പോലീസ് കണ്ടെത്തി നല്കിയത്. ഐ ഫോണ്, ഗൂഗിള് തുടങ്ങിയ വിലകൂടിയ മോഡലുകളും ഇതില് ഉള്പ്പെടുന്നു.
ഈസ്റ്റ് ഫോര്ട്ട്, പഴവങ്ങാടി, ചാല എന്നിവിടങ്ങളില് നിന്നു സ്മാര്ട്ട് ഫോണുകള് നഷ്ടപ്പെട്ട പരാതികളാണ് കൂടുതലായി ലഭിച്ചിരുന്നത്. സിറ്റി പോലീസ് കമ്മീഷണര് കാര്ത്തികിന്റെ നിര്ദേശപ്രകാരം ഡപ്യൂട്ടി പോലീസ് കമ്മീഷണര് ദീപക് ധന്ഖര്, ഫോര്ട്ട് സി.ഐ എസ്.ബി. പ്രവീണ്, എസ്സിപിഒ ശ്രീജിത്ത് എന്നിവരുടെ നേതൃത്വത്തിലുള്ള പ്രത്യേക സംഘമാണ് സൈബര് സെല്ലിന്റെ സഹായത്തോടെ സ്മാര്ട്ട് ഫോണുകള് കണ്ടെത്തി നല്കിയത്.
നഷ്ടപ്പെട്ട സ്മാര്ട്ട് ഫോണുകളുടെ വിവരങ്ങള് സെന്ട്രല് ഇക്യുപ്മെന്റ് ഐഡന്റിറ്റി റജിസ്റ്റര് പോര്ട്ടല് മുഖേന രജിസ്റ്റര് ചെയ്ത് അതിന്റെ സാങ്കേതിക സഹായത്തോടെ കേരളത്തിലും മറ്റു സംസ്ഥാനങ്ങളിലും ഐഎംഇഐ നമ്പര്, ലൊക്കേഷന് എന്നിവ ട്രേസ് ചെയ്താണ് ഫോണുകള് കണ്ടെത്തിയത്. തിരികെ ലഭ്യമായ ഫോണുകള് ഫോര്ട്ട് ജനമൈത്രി സ്റ്റേഷനില് വച്ചാണ് ഉടമകളെ വിളിച്ചുവരുത്തി അവര്ക്കു കമ്മീഷണറുടെ നേതൃത്വത്തില് തിരികെ നല്കിയത്.
