തിരുവനന്തപുരം: കോണ്ഗ്രസ് നേതാവ് സുബ്രഹ്മണ്യനെതിരായ കേസ് രാഷ്ട്രീയ പകപോക്കലിന്റെ ഭാഗമെന്ന് കോണ്ഗ്രസ് പ്രവര്ത്തകസമിതി അംഗം രമേശ് ചെന്നിത്തല. കേസെടുത്ത നടപടിയില് ശക്തമായി പ്രതിഷേധിക്കുന്നുവെന്നും നിയമപരമായും രാഷ്ട്രീയമായും കേസിനെ നേരിടുമെന്നും അദ്ദേഹം വ്യക്തമാക്കി.
മുഖ്യമന്ത്രിയെ ആരും വിമര്ശിക്കാന് പാടില്ലെന്ന വിരട്ടലിന്റെ ഭാഗമാണ് സുബ്രഹ്മണ്യനെതിരായ കേസ്. ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖര് ഫേസ്ബുക്കിലൂടെ മുഖ്യമന്ത്രിയും ഉണ്ണിക്കൃഷ്ണന് പോറ്റിയും ഒരുമിച്ചുള്ള ഫോട്ടോ പങ്കുവച്ചപ്പോള് പോലീസ് കേസെടുത്തില്ല. ബിജെപിയും സിപിഎമ്മും തമ്മിലുള്ള അന്തര്ധാര സജീവമായതുകൊണ്ടാണ് രാജീവ് ചന്ദ്രശേഖറിനെതിരെ കേസെടുക്കാത്തത്.
മുഖ്യമന്ത്രിയെ ആരും വിമര്ശിക്കാന് പാടില്ലെന്ന അഹംഭാവം അംഗീകരിക്കാനാകില്ല. കോണ്ഗ്രസ്- യുഡിഎഫ് പ്രവര്ത്തകരെ ഓലപ്പാമ്പ് കാട്ടി പേടിപ്പിക്കാമെന്ന മുഖ്യമന്ത്രിയുടെ തന്ത്രം വിലപ്പോവില്ലെന്നും ശക്തമായി പ്രതികരിക്കുമെന്നും രമേശ് ചെന്നിത്തല വ്യക്തമാക്കി.
ഉണ്ണികൃഷ്ണന് പോറ്റിയും കടകംപള്ളി സുരേന്ദ്രനും ഒരുമിച്ചുള്ള ഫോട്ടോകള് പുറത്തുവന്നതിനെക്കുറിച്ച് മുഖ്യമന്ത്രിയ്ക്ക് ഒന്നും പറയാനില്ലേയെന്നും സോണിയാഗാന്ധിയോടൊപ്പം ഉണ്ണികൃഷ്ണന് പോറ്റി നില്ക്കുന്ന ഫോട്ടോ മാത്രമേ മുഖ്യമന്ത്രിക്ക് ഓര്മയുള്ളോയെന്നും അദ്ദേഹം ചോദിച്ചു.
മാധ്യമപ്രവര്ത്തകരുടെ ചോദ്യങ്ങള്ക്ക് മറുപടിയായാണ് അദ്ദേഹം ഇക്കാര്യങ്ങള് വ്യക്തമാക്കിയത്.
