രാത്രികാലങ്ങളിൽ സ്ത്രീകൾ നേരിടുന്ന സുരക്ഷാ പ്രശ്നങ്ങൾ നേരിട്ടറിയാൻ സ്ത്രീയായി വേഷംമാറി രാത്രി ഡൽഹി നഗരത്തിലൂടെ സ്കൂട്ടറിൽ സഞ്ചരിച്ച് സോഷ്യൽ മീഡിയ ഇൻഫ്ലുവൻസറുടെ വേറിട്ട പരീക്ഷണം സമൂഹ മാധ്യമങ്ങളിൽ ശ്രദ്ധനേടുന്നു.
രണ്ട് മണിക്കൂർ നീണ്ട യാത്രയിൽ തനിക്ക് നേരിടേണ്ടി വന്ന കയ്പേറിയ അനുഭവങ്ങൾ പങ്കുവെച്ചുകൊണ്ട് ഇൻസ്റ്റാഗ്രാം ക്രിയേറ്ററായ ‘ബിജെയ്ന്റൽ’പങ്കുവെച്ച വീഡിയോയാണ് ഇപ്പോൾ സോഷ്യൽ മീഡിയയിൽ തരംഗമാകുന്നത്.
വീട്ടിൽ വെച്ച് സ്ത്രീകളുടെ വസ്ത്രം ധരിച്ച്, മേക്കപ്പ് ഇട്ട്, ദുപ്പട്ട കൊണ്ട് തലയും മുഖവും മറച്ച ശേഷമാണ് ഇയാൾ രാത്രി സ്കൂട്ടറിൽ യാത്ര തിരിഞ്ഞത്. എന്നാൽ നഗരത്തിലെത്തിയതോടെ കാര്യങ്ങൾ മാറിമറിഞ്ഞു.
റോഡിലിറങ്ങിയത് മുതൽ വഴിയാത്രക്കാരും ഓട്ടോ ഡ്രൈവർമാരും മറ്റ് വാഹനങ്ങളിലുള്ളവരും തുടർച്ചയായി തുറിച്ചുനോക്കാൻ തുടങ്ങി. രണ്ട് പുരുഷന്മാർ സ്കൂട്ടറിനെ പിന്തുടരുകയും അടുക്കാൻ ശ്രമിക്കുകയും ചെയ്തു.
യാത്രയ്ക്കിടയിൽ ഓട്ടോ ഡ്രൈവർമാർ സ്കൂട്ടറിന് കുറുകെ വാഹനം ഓടിച്ച് തടസമുണ്ടാക്കാൻ ശ്രമിച്ചു. പിന്നാലെ സുഹൃത്തുക്കൾ ഇതെല്ലാം ക്യാമറയിൽ പകർത്തുണ്ടെന്ന് കണ്ടതോടെയാണ് ഇവർ പിന്മാറിയത്. കാര്യങ്ങൾ കൈവിട്ടുപോകുമെന്നും സുരക്ഷിതമല്ലെന്നും ബോധ്യപ്പെട്ടതോടെ രണ്ട് മണിക്കൂറിനുള്ളിൽ ഇയാൾ പരീക്ഷണം അവസാനിപ്പിച്ചു.
വീഡിയോ പുറത്തുവന്നതോടെ സോഷ്യൽ മീഡിയയിൽ വലിയ ചർച്ചകൾക്കാണ് വഴിതുറന്നിരിക്കുന്നത്. ഡൽഹിയിൽ സ്ത്രീകൾ നേരിടുന്ന സുരക്ഷാ ഭീഷണിയുടെ യഥാർഥ ചിത്രമാണിതെന്ന് ഭൂരിഭാഗം പേരും അഭിപ്രായപ്പെട്ടപ്പോൾ, ഒറ്റപ്പെട്ട അനുഭവങ്ങളെ വെച്ച് പൊതുവൽക്കരിക്കരുത് എന്ന് അഭിപ്രായപ്പെടുന്നവരുമുണ്ട്.
