തൊടുപുഴ : പുലര്ച്ചെ റബര് ടാപ്പിംഗിന് പോയ രണ്ടു പേര്ക്ക് നേരെ കാട്ടുപോത്തിന്റെ ആക്രമണം. ഉടുമ്പന്നുര് മഞ്ചിക്കല്ല് സ്വദേശികളായ കൂവക്കാട്ടില് മുരളി (60), പുരയിടത്തില് സാബു ( 62) എന്നിവര്ക്ക് നേരെയാണ് കാട്ടുപോത്തിന്റെ ആക്രമണം ഉണ്ടായത്. കൈയ്ക്ക് ഒടിവ് സംഭവിച്ച മുരളിയെ തൊടുപുഴയിലെ സ്വകാര്യ ആശുപത്രിയില് പ്രവേശിപ്പിച്ചു. സാബുവിനും കൈയ്ക്ക് പരിക്കേറ്റങ്കിലും സാരമുള്ളതല്ല.
ഇന്ന് പുലര്ച്ചെ 3.30 ഓടെ മഞ്ചിക്കല്ല് ഒലിവിരിപ്പ് മേഖലയിലാണ് കാട്ടുപോത്തിന്റെ ആക്രമണം ഉണ്ടായത്. രാവിലെ റബര് ടാപ്പിംഗിനായി പതിവു പോലെ പോകുകയിരുന്നു ഇരുവരും. സ്കൂട്ടറില് പോവുകയായിരുന്ന സാബു റോഡിന് മുന്നില് കാട്ടുപോത്തിനെ കണ്ട് വാഹനം വെട്ടിച്ച് മാറ്റി. എന്നാല് കൊമ്പു കൊണ്ട് കൈയ്ക്ക് തട്ടി ചെറുതായി പരിക്കേറ്റെങ്കിലും കാട്ടുപോത്തില് നിന്നും രക്ഷപ്പെടാനായി. തുടര്ന്ന് മുന്നോട്ട് പോകുമ്പോഴാണ് കാട്ടുപോത്ത് ഇടിച്ചിട്ട നിലയില് മുരളി പരിക്കേറ്റ് റോഡില് കിടക്കുന്നത് കണ്ടത്
തുടര്ന്ന് വീട്ടുകാരെയും നാട്ടുകാരെയും വിവരം അറിയിച്ച് മുരളിയെ ആശുപത്രിയിലാക്കുകയായിരുന്നു. നാട്ടുകാര് വിവരം അറിയിച്ചതിനെ തുടര്ന്ന് രാവിലെ അഞ്ചോടെ വനം വകുപ്പ് ഉദ്യോഗസ്ഥര് സ്ഥലത്തെത്തി മേഖലയില് പരിശോധന നടത്തിയെങ്കിലും കാട്ടു പോത്തിനെ കണ്ടെത്താനായില്ല. സമീപത്തെ വീടിന്റെ മുറ്റത്തു വരെ കാല്പ്പാടുകള് കണ്ടെത്തിയിട്ടുണ്ട്.
പ്രദേശത്ത് മുന്കാലങ്ങളില് കാട്ടുപന്നിയുടെ ശല്യം ഉണ്ടാകാറുണ്ടെങ്കിലും കാട്ടുപോത്ത് എത്തുന്നത് ആദ്യമാണെന്ന് മുന് പഞ്ചായത്ത് പ്രസിഡന്റ് എം. ലതീഷ് പറഞ്ഞു. ഉപ്പുകുന്ന് മേഖലയില് നിന്നാകാം കാട്ടുപോത്ത് എത്തിയതെന്നാണ് നിഗമനം. പോലീസും റവന്യു ഉദ്യോഗസ്ഥരും സ്ഥലത്തെത്തിയിരുന്നു.
