കോട്ടയം: ഇടവേളയ്ക്കു ശേഷം കോട്ടയം നഗരസഭ ആരോഗ്യവിഭാഗം ഹോട്ടലുകളില്‍ നടത്തിയ പരിശോധനയില്‍ പഴകിയതും ഉപയോഗശൂന്യവുമായ ഭക്ഷണപദാര്‍ഥങ്ങള്‍ പിടികൂടി. കഞ്ഞിക്കുഴി, റെയില്‍വേസ്റ്റേഷന്‍ എന്നിവിടങ്ങളിലെ ഏഴു ഹോട്ടലുകളില്‍ ഇന്നു രാവിലെയാണ് നഗരസഭ അധികൃതര്‍ പരിശോധന നടത്തിയത്.
ദിവസങ്ങള്‍ പഴക്കമുള്ള ചപ്പാത്തി, ചിക്കന്‍, ചോറ്, ബീഫ്കറി, മീന്‍ കറി, വെജിറ്റബിള്‍ കറികള്‍ എന്നിവയാണ് പിടികൂടിയത്. ആഴ്ചകളോളം പഴക്കമുള്ള എണ്ണയും പിടികൂടി. പരിശോധന നടത്തിയ ഹോട്ടലുകളില്‍ പണിയെടുക്കുന്നവരെല്ലാം ഇതരസംസ്ഥാന തൊഴിലാളികളാണെന്ന് കണ്ടെത്തി. തുടര്‍ന്നു നടത്തിയ പരിശോധനയില്‍ ഇവര്‍ക്ക് ഹെല്‍ത്ത് കാര്‍ഡില്ലെന്നും ആരോഗ്യ വിഭാഗം അധികൃതര്‍ പറഞ്ഞു.
തൊഴിലാളികള്‍ക്ക് അടിയന്തരമായി മെഡിക്കല്‍ പരിശോധന നടത്തി ഹെല്‍ത്ത് കാര്‍ഡ് എടുക്കണമെന്നു നിര്‍ദേശിച്ചതായും ഹോട്ടലുകള്‍ക്കെതിരെ നോട്ടീസ് നല്‍കിയതായും ആരോഗ്യവിഭാഗം ഉദ്യോഗസ്ഥര്‍ പറഞ്ഞു. പരിശോധനയ്ക്ക് ഹെല്‍ത്ത് ഇന്‍സ്‌പെക്്ടര്‍ ആറ്റ്‌ലി പി.ജോണ്‍, ജൂണിയര്‍ ഹെല്‍ത്ത് ഇന്‍സ്‌പെക്്ടര്‍ എം. സുനില്‍ എന്നിവര്‍ നേതൃത്വം നല്‍കി.
