കോട്ടയം: തദ്ദേശ തെരഞ്ഞെടുപ്പിനു തൊട്ടുമുന്നെ റബര്‍ ഷീറ്റ് താങ്ങുവില 200 രൂപയായി ഉയര്‍ത്തിയ സര്‍ക്കാര്‍ പ്രഖ്യാപനത്തില്‍ കര്‍ഷകര്‍ക്ക് നേട്ടമില്ല. നവംബര്‍ ഒന്നുമുതല്‍ മാത്രമാണ് 200 രൂപ ഉറപ്പാക്കുന്ന സബ്ഡിഡി ലഭിക്കുക. തുക എന്നു വിതരണം ചെയ്യുമെന്നും ഉറപ്പുനല്‍കുന്നില്ല.
സംസ്ഥാനത്ത് 60 ശതമാനം കര്‍ഷകരും ലാറ്റക്‌സ് വില്‍ക്കുന്ന സാഹചര്യത്തില്‍ ലാറ്റക്‌സിന് ന്യായവില ഉറപ്പാക്കാന്‍ നടപടിയൊന്നുമില്ല. കിലോയ്ക്ക് ഏഴു രൂപയോളം സംസ്‌കരണ ചെലവില്‍ ഷീറ്റ് തയാറാക്കുന്നവര്‍ക്ക് മാത്രമാണ് സബ്‌സിഡി ലഭിക്കുക.
താങ്ങുവില പദ്ധതിയില്‍ ഇക്കൊല്ലത്തെ അംഗത്വം പുനഃസ്ഥാപിക്കാനുള്ള കാലാവധി സെപ്റ്റംബറില്‍ പൂര്‍ത്തിയായിരുന്നു. വില 200 പ്രഖ്യാപിച്ചപ്പോള്‍ കര്‍ഷകരുടെ പ്രതിഷേധത്തെ തുടര്‍ന്ന് പുനഃസ്ഥാപന കാലാവധി കഴിഞ്ഞയാഴ്ച ദീര്‍ഘിപ്പിച്ചു.
ഇതിനായുള്ള വെബ്‌സൈറ്റില്‍ കഴിഞ്ഞ വര്‍ഷം രജിസ്റ്റര്‍ ചെയ്തിരുന്ന കര്‍ഷകര്‍ക്ക് മാത്രമാണ് വീണ്ടും പദ്ധതിയില്‍ തുടരാനാവുക. പുതുതായി രജിസ്റ്റര്‍ ചെയ്യാനുള്ള ഓപ്ഷന്‍ വെബ് സൈറ്റില്‍ ലഭ്യമല്ല. ആര്‍പിഎസുകള്‍ തുടരെ അധികൃതരെ ബന്ധപ്പെടുമ്പോള്‍ സര്‍ക്കാരില്‍ നിന്ന് അനുമതി ലഭിച്ചില്ലെന്ന മറുപടിയാണ് ലഭിക്കുന്നത്.
റബര്‍ താങ്ങുവില ഉയര്‍ത്തിയതായാണ് എല്‍ഡിഎഫ് തെരഞ്ഞെടുപ്പിലുടനീളം വോട്ടര്‍മാരെ ബോധിപ്പിക്കുന്നത്. എന്നാല്‍ കഴിഞ്ഞ ഏപ്രില്‍ മുതല്‍ പ്രാബല്യത്തില്‍ വരുത്താമായിരുന്ന സബ്‌സിഡി ഉയര്‍ത്തല്‍ ഒഴിവാക്കുക വഴി സര്‍ക്കാരിന് കോടികളുടെ സാമ്പത്തിക നേട്ടമാണുണ്ടാകുന്നത്.
നിലവില്‍ റബറിന് 180 രൂപയില്‍ താഴെയാണ് മാര്‍ക്കറ്റ് വില ലഭിക്കുന്നത്. ഒരു കിലോയ്ക്ക് 20 വീതം സബ്‌സിഡി ലഭിക്കേണ്ട പദ്ധതിയില്‍ പുതിയ അപേക്ഷകരെ ഒഴിവാക്കിയതിലും ആക്ഷേപമുണ്ട്.
മാത്രവുമല്ല ലാറ്റക്‌സ് വില്‍ക്കുന്ന ആറു ലക്ഷം കര്‍ഷകര്‍ക്ക് സബ്‌സിഡി പദ്ധതിയുടെ നേട്ടം ലഭിക്കില്ല. ഒരു കിലോ റബറിന് 250 രൂപ നല്‍കുമെന്ന് പ്രകടന പത്രികയില്‍ പ്രഖ്യാപിച്ചാണ് എല്‍ഡിഎഫ് സര്‍ക്കാര്‍ അധികാരത്തിലെത്തിയത്.
കഴിഞ്ഞ അഞ്ചു ബജറ്റുകളിലും വില സ്ഥിരതാ പദ്ധതിയിലേക്ക് 500 കോടി രൂപ വീതം വകയിരുത്തിയെങ്കിലും ആകെ 40 കോടി രൂപയില്‍ താഴെയാണ് വിനിയോഗിച്ചത്. ബജറ്റില്‍ ലാപ്‌സായ തുക വിനിയോഗിച്ചാല്‍ കിലോയ്ക്ക് 300 രൂപ താങ്ങുവില നല്‍കാനാകുമെന്നാണ് കര‍ഷക സംഘടനകളുടെ നിലപാട്.
സ്വന്തം ലേഖകന്‍
