തിരുവനന്തപുരം: സംസ്ഥാന രാഷ്ട്രീയത്തിൽ വലിയ ചർച്ചകൾക്കും തർക്കങ്ങൾക്കും വഴിവെച്ച വൈദ്യുതി പർച്ചേസ് വിവാദം സമവായത്തിലേക്ക്. ക്ലിഫ് ഹൗസിൽ മുഖ്യമന്ത്രി വി.ഡി. സതീശന്‍റെ അധ്യക്ഷതയിൽ ചേർന്ന യോഗത്തിലാണ് വിഷയത്തിൽ മഞ്ഞുരുകിയത്. മന്ത്രിമാരായ സണ്ണി ജോസഫ്, രമേശ് ചെന്നിത്തല എന്നിവരും ചർച്ചയിൽ പങ്കെടുത്തു. കെഎസ്ഇബി എംഡിയുമായി മുഖ്യമന്ത്രി പ്രത്യേകമായി ചർച്ച നടത്തിയെന്ന പ്രചാരണം അദ്ദേഹം നിഷേധിച്ചു.
ഉദ്യോഗസ്ഥരുടെ യോഗത്തിന് ശേഷമാണ് കൂടിക്കാഴ്ച നടന്നതെന്നും മുഖ്യമന്ത്രി വിശദീകരിച്ചു. നിലവിൽ സംസ്ഥാനത്ത് വൈദ്യുതി ക്ഷാമമില്ലെന്നും അടുത്ത രണ്ടുമാസത്തേക്ക് വൈദ്യുതി വാങ്ങേണ്ട സാഹചര്യമില്ലെന്നുമാണ് ഉദ്യോഗസ്ഥർ അറിയിച്ചതെന്നും അദ്ദേഹം പറഞ്ഞു. ചർച്ചയിൽ സണ്ണി ജോസഫ് എതിർപ്പുകളൊന്നും ഉന്നയിച്ചില്ലെന്നാണ് മുഖ്യമന്ത്രിയുടെ വിശദീകരണം. അതേസമയം ഭാവിയിലെ വൈദ്യുതി ആവശ്യകത മുന്നിൽക്കണ്ട് പുതിയ കരാറിന്‍റെ സാധ്യതകൾ പരിശോധിക്കാനും ധാരണയായി.
ബോർഡ്-കോർപറേഷൻ യോഗത്തിനിടെയാണ് വൈദ്യുതി പർച്ചേസ് വിവാദവും ചർച്ചയായത്. രമേശ് ചെന്നിത്തലയും ചർച്ചയിൽ പങ്കെടുത്തു. ജിഎൻഎയുമായുള്ള വൈദ്യുതി കരാർ റദ്ദാക്കിയതും ഹിമാചലിൽനിന്ന് വൈദ്യുതി വാങ്ങാനുള്ള നീക്കവുമാണ് വിവാദത്തിന് വഴിവെച്ചത്. ജിഎൻഎ കരാർ പിൻവലിച്ച വിവരം താൻ അറിഞ്ഞത് മാധ്യമങ്ങളിലൂടെയാണെന്ന മന്ത്രി സണ്ണി ജോസഫിന്‍റെ തുറന്നുപറച്ചിൽ വലിയ രാഷ്ട്രീയ ചർച്ചയായിരുന്നു.
വൈദ്യുതി ബോർഡിന്‍റെ തീരുമാനങ്ങൾ തന്നെ അറിയിക്കാതെയാണ് മുന്നോട്ടുപോയതെന്ന മന്ത്രിയുടെ അതൃപ്തിയും ഇതോടെ പരസ്യമായി. വൈദ്യുതി ബോർഡ് ചെയർമാനും ഊർജ സെക്രട്ടറിയും മുഖ്യമന്ത്രിയുമായി ചർച്ച നടത്തി തീരുമാനങ്ങളെടുത്തുവെന്ന വാർത്തകളിൽനിന്നാണ് ഇക്കാര്യം മനസിലാക്കിയതെന്നായിരുന്നു മന്ത്രിയുടെ വിശദീകരണം. വൈദ്യുതി ബോർഡ് അയച്ച ഫയൽ തനിക്ക് കൈമാറിയത് മന്ത്രിയാണെന്നും തീരുമാനമെടുത്തശേഷം ഫയൽ മന്ത്രിക്ക് തന്നെ തിരിച്ചയച്ചതാണെന്നും മുഖ്യമന്ത്രി വ്യക്തമാക്കി.
തുടർന്ന് മന്ത്രി തന്നെയാണ് ഫയൽ ബോർഡിന് കൈമാറിയതെന്നും അദ്ദേഹം വിശദീകരിച്ചു. വിവാദങ്ങൾക്കിടെ കെഎസ്ഇബി ചെയർമാൻ എൻ. പ്രശാന്ത് കഴിഞ്ഞ ദിവസം മന്ത്രി സണ്ണി ജോസഫുമായി കൂടിക്കാഴ്ച നടത്തിയിരുന്നു. ഇതുവരെ ഉണ്ടായ സംഭവവികാസങ്ങൾ ചെയർമാൻ മന്ത്രിയെ ധരിപ്പിച്ചതായാണ് സൂചന. ഇതിന് പിന്നാലെയാണ് ക്ലിഫ് ഹൗസിൽ നിർണായക ചർച്ച നടന്നത്. നിലവിൽ വൈദ്യുതി വാങ്ങേണ്ട സാഹചര്യമില്ലെന്ന ഉദ്യോഗസ്ഥരുടെ വിലയിരുത്തലിനൊപ്പം ഭാവിയിലെ ആവശ്യകത കൂടി കണക്കിലെടുത്ത് പുതിയ കരാർ സാധ്യതകൾ പരിശോധിക്കാനാണ് തീരുമാനം.
വൈദ്യുതി പ്രതിസന്ധി ഗൂഢാലോചനയോ?
തിരുവനന്തപുരം: സമ്മർദം ചെലുത്തി വൈദ്യുതി വാങ്ങൽ കരാറിൽ ഒപ്പിടുവിക്കാൻ നീക്കം നടന്നതായി മുഖ്യമന്ത്രി വി.ഡി.സതീശൻ. സംസ്ഥാനത്തു രൂക്ഷമായ വൈദ്യുതി പ്രതിസന്ധിയാണെന്നും ഉടൻ വൈദ്യുതി വാങ്ങിയില്ലെങ്കിൽ നവംബർ ഒന്നുമുതൽ പവർകട്ടുണ്ടാകുമെന്നുമാണ് ഒക്‌ടോബർ 29ന് വൈദ്യുതിമന്ത്രി സണ്ണി ജോസഫ് മുഖേന കെഎസ്ഇബി കൈമാറിയ റിപ്പോർട്ടിൽ പറഞ്ഞത്.
ഫയലിൽ ഒപ്പിടണമെന്നു പറഞ്ഞാൽ ഉടനെ ഒപ്പുവയ്ക്കുന്ന ആളല്ല ഇപ്പോഴത്തെ മുഖ്യമന്ത്രി. സംസ്ഥാനത്തിനു ദോഷമാകുന്ന ഒരുകാര്യവും ചെയ്യില്ല. ഇതിനു പിന്നാലെ വൈദ്യുതി പ്രതിസന്ധി പരിഹരിക്കാനുള്ള ഫയലിൽ 22 ദിവസമായിട്ടും മുഖ്യമന്ത്രി ഒപ്പുവയ്ക്കുന്നില്ലെന്നും സംസ്ഥാനം രൂക്ഷമായ വൈദ്യുതിക്ഷാമത്തിലേക്ക് പോകുകയാണെന്നും ചില മാധ്യമങ്ങളിൽ വാർത്തകൾ വന്നു. പ്രതിപക്ഷ നേതാവ് പിണറായി വിജയൻ ഇത് ആവർത്തിച്ചു.
വൈദ്യുതി പ്രതിസന്ധി പരിഹരിക്കാൻ ഹിമാചൽ സർക്കാരിന്‍റെ വൈദ്യുതിപോലും വാങ്ങാൻ മുഖ്യമന്ത്രി കൂട്ടാക്കുന്നില്ലെന്ന് പിണറായി കുറ്റപ്പെടുത്തി. സിപിഎം സംസ്ഥാന സെക്രട്ടറി എം.വി.ഗോവിന്ദനും കാര്യമറിയാതെ ഇതെല്ലാം ആവർത്തിച്ചു. ഇത് എന്താണെന്നുപോലും പിടികിട്ടാതെയാണ് ഗോവിന്ദൻ പിണറായിക്കൊപ്പം കൂടിയത്.
വൈദ്യുതി കരാറിൽ ഒപ്പുവയ്പിക്കാനുള്ള സമ്മർദമായിരുന്നു ഇതെല്ലാം. വൈദ്യുതിപ്രതിസന്ധിയുണ്ടെന്നും പരിഹരിക്കാൻ തത്കാലം രണ്ടു കരാർ നിർദേശങ്ങളുണ്ടെന്നും ഏത് സ്വീകരിക്കണമെന്ന് പറയണമെന്നും ആവശ്യപ്പെട്ടുള്ള ഫയലാണ് മുന്നിലെത്തിയത്.
ഒന്ന് ഹിമാചൽപ്രദേശ് സർക്കാരിൽനിന്ന് ഇടനിലക്കാർ മുഖേന യൂണിറ്റിന് 14.50 രൂപയ്ക്കും മറ്റൊന്ന് സ്വകാര്യസ്ഥാപനമായ ജിഎൻഎയിൽ നിന്ന് 8.63നും 8.90 നും വൈദ്യുതി വാങ്ങാനുള്ളതുമായിരുന്നു. പരിശോധിച്ചപ്പോൾ ജിഎൻഎയിൽനിന്ന് വാങ്ങുന്നതാണ് സംസ്ഥാനത്തിന് സാമ്പത്തിക നേട്ടം എന്ന് തോന്നി. അക്കാര്യം വൈദ്യുതിമന്ത്രി മുഖേന മറ്റു നടപടികൾക്കായി കെഎസ്ഇബിക്ക് കൈമാറി.
അവർ റെഗുലേറ്ററി കമ്മിഷൻ അനുമതിയും മറ്റു സാങ്കേതിക കാര്യങ്ങളും വൈദ്യുതി ഡിമാൻഡും സാഹചര്യങ്ങളും പരിഗണിച്ചാണ് കരാറിലേക്കെത്തുക. ഇതുവരെ കരാർ ഒപ്പിട്ടിട്ടില്ല. അതിനിടയിൽ കുറഞ്ഞ നിരക്കിൽ വൈദ്യുതി ലഭ്യമാക്കാൻ കേന്ദ്ര ഏജൻസിയായ എൻടിപിസിയുമായി ഡൽഹിയിൽ താൻതന്നെ നേരിട്ടു ചർച്ച നടത്തി.
5.18 രൂപയ്ക്ക് വൈദ്യുതി മാർച്ച് മുതൽ മേയ് വരെ തരാൻ തയാറാണെന്ന് അവർ അറിയിച്ചു. സിന്നാർ പ്ലാന്‍റിൽനിന്നുള്ള വൈദ്യുതിയാണത്. അത് പരിഗണിച്ച് ജിഎൻഎയിൽ നിന്ന് വാങ്ങുകയാണെങ്കിൽ മാർച്ച് വരെ മതിയെന്നു നിർദേശിച്ചു. എൻടിപിസി 340 മെഗാവാട്ടിനാണ് അനുമതി നൽകിയത്. അത് 640 മെഗാവാട്ടിലേക്ക് ഉയർത്താനും ദീർഘകാല കരാർ ഒപ്പിടാനുമാണ് സംസ്ഥാനം ശ്രമിക്കുന്നത്. കഴിയുമെങ്കിൽ അത് 1000മെഗാവാട്ടിലും എത്തിക്കുമെന്നും മുഖ്യമന്ത്രി പറഞ്ഞു.
വൈദ്യുതി മന്ത്രിയുമായി ഭിന്നതയില്ല: മുഖ്യമന്ത്രി
തിരുവനന്തപുരം: വൈദ്യുതികരാർ സംബന്ധിച്ച് വൈദ്യുതി മന്ത്രി സണ്ണി ജോസഫുമായി ഭിന്നതയില്ലെന്നും വൈദ്യുതി പ്രതിസന്ധി സംബന്ധിച്ച കെഎസ്ഇബിയുടെ പരസ്പരവിരുദ്ധ റിപ്പോർട്ടുണ്ടായതെങ്ങനെയെന്ന് പരിശോധിക്കുമെന്നും മുഖ്യമന്ത്രി വി.ഡി. സതീശൻ പറഞ്ഞു.
വൈദ്യുതിവാങ്ങലിന് ജിഎൻഎയുമായി ഒരു കരാറും ഉണ്ടാക്കിയിട്ടില്ല. ഇല്ലാത്ത കരാർ പിന്നെങ്ങനെ റദ്ദാക്കും. മഴ നല്ല നിലയിൽ ലഭിച്ചു തുടങ്ങിയതും വൈദ്യുതി ഉപയോഗം കുറഞ്ഞതും കണക്കിലെടുത്ത് തത്കാലം വൈദ്യുതി വാങ്ങേണ്ട സാഹചര്യമില്ലെന്ന് കെഎസ്ഇബി പുതിയ റിപ്പോർട്ട് നൽകി.
സംസ്ഥാനത്ത് വൈദ്യുതി പ്രതിസന്ധിയുണ്ടാക്കിയത് മുൻ സർക്കാരിന്‍റെ ആസൂത്രണമില്ലായ്മയാണ്. അതു ജനങ്ങളോടുള്ള കുറ്റകൃത്യമാണ്. അവർക്ക് താത്പര്യം ഹ്രസ്വകാല കരാറുണ്ടാക്കി വൈദ്യുതി വാങ്ങുന്നതായിരുന്നു. മഴ കുറഞ്ഞപ്പോൾ അതിനു തിരിച്ചടിയുണ്ടായി. അടുത്തവർഷം മുതൽ വൈദ്യുതി ലഭ്യമാക്കാൻ ഹ്രസ്വ-ദീർഘകാല കരാറുണ്ടാക്കാനുള്ള നടപടികൾ സ്വീകരിച്ചു വരികയാണെന്നും മുഖ്യമന്ത്രി പറഞ്ഞു.
തർക്കങ്ങൾക്കുള്ള മറുപടി കെപിസിസി പ്രസിഡന്‍റ് പറയുമെന്ന് അടൂർ പ്രകാശ്
തിരുവനന്തപുരം: സർക്കാരും പാർട്ടിയും തമ്മിലുള്ള ഏകോപനത്തിന്റെ കാര്യവും തർക്കങ്ങൾക്കുമുള്ള മറുപടിയും കെപിസിസി പ്രസിഡന്‍റ് പറയുമെന്ന് യുഡിഎഫ് കണ്‍വീനർ അടൂർ പ്രകാശ് എംപി.
ഓരോ വിഷയങ്ങളിലും തനിക്ക് വ്യക്തമായ അഭിപ്രായമുണ്ട്. പറയേണ്ട സമയത്ത് താൻ അഭിപ്രായം പറയും. മന്ത്രിസഭയിലെ കൂട്ടുത്തരവാദിത്വത്തെക്കുറിച്ച് മന്ത്രിമാരുടെ അഭിപ്രായങ്ങൾ നിങ്ങൾ വിലയിരുത്തൂവെന്ന് അദ്ദേഹം വ്യക്തമാക്കി.
മാധ്യമപ്രവർത്തകരുടെ ചോദ്യങ്ങൾക്ക് മറുപടിയായാണ് അദ്ദേഹം ഇക്കാര്യങ്ങൾ പറഞ്ഞത്.
കോൺഗ്രസിലെ അതൃപ്തിയിൽ ഹൈക്കമാൻഡ് ഇടപെടൽ
തിരുവനന്തപുരം: കേരളത്തിലെ കോൺഗ്രസ് പാർട്ടിക്കുള്ളിലെ ആഭ്യന്തര വിഷയങ്ങളിലും വിവാദങ്ങളിലും നേതാക്കളും വക്താക്കളും പരസ്യപ്രതികരണം നടത്തുന്നതിനെതിരേ ഹൈക്കമാൻഡ് ഇടപെടൽ. പാര്‍ട്ടിക്കുള്ളിലെ പ്രശ്‌നങ്ങളിലും ഭരണപരമായ വിഷയങ്ങളിലും പരസ്യ വിഴുപ്പഴക്കലുകള്‍ പാടില്ലെന്നു നേതാക്കൾക്കു കേന്ദ്ര നേതൃത്വം നിര്‍ദേശം നല്‍കിയതായിട്ടാണ് സൂചന.
അടൂർ പ്രകാശിന്‍റെ പ്രതികരണത്തിനു അതേനാണയത്തിൽ മറുപടി നൽകാനുള്ള നീക്കമൊന്നും മുഖ്യമന്ത്രി ഇന്നലെ നടത്തിയില്ലെന്നതും ശ്രദ്ധേയമാണ്. മന്ത്രിസഭാ യോഗത്തിനുശേഷമുള്ള വാർത്താസമ്മേളനത്തിൽ മുഖ്യമന്ത്രിയോടു മാധ്യമപ്രവർത്തകർ ഇതുസംബന്ധിച്ചു ചോദ്യങ്ങൾ ചോദിച്ചെങ്കിലും മറുപടി നൽകാൻ തയാറായില്ല. അടൂർപ്രകാശിനെ പൂർണമായും അവഗണിച്ചതാണോ അതോ ഹൈക്കമാൻഡ് നിർദേശം പാലിച്ചതാണോ എന്നതുമാത്രമാണ് അറിയാനുള്ളത്. യുഡിഎഫ് യോഗം ചേരുന്ന തീയതി മാധ്യമങ്ങളെ അറിയിക്കുമെന്നാണ് മുഖ്യമന്ത്രി പറഞ്ഞത്.
കഴിഞ്ഞ ദിവസം മുഖ്യമന്ത്രിക്കെതിരേ ആഞ്ഞടിച്ച അടൂർപ്രകാശും ഹൈക്കമാൻഡ് ഇടപെടലിനുശേഷം വളരെ ശാന്തനായിട്ടാണ് കാണപ്പെട്ടത്. ഇന്നലെ സംസാരിച്ച അടൂർ പ്രകാശ് വിവാദത്തിലേക്കും വിമർശനത്തിലേക്കും കടന്നില്ല. താനും മുഖ്യമന്ത്രിയും തമ്മിൽ പ്രശ്നങ്ങളുണ്ടെന്ന് മാധ്യമങ്ങൾ വ്യാഖ്യാനിക്കേണ്ടെന്നും അടൂർ പ്രകാശ് വ്യക്തമാക്കി. യുഡിഎഫ് യോഗം എപ്പോൾ ചേരുമെന്ന ചോദ്യത്തിന് യോഗം വൈകാതെയുണ്ടാകുമെന്നായിരുന്നു അദ്ദേഹത്തിന്‍റെയും മറുപടി.
കഴിഞ്ഞ ദിവസങ്ങളില്‍ മുന്നണി യോഗങ്ങള്‍ ചേരുന്നതിനെച്ചൊല്ലിയും ഭരണത്തിലെ കൂട്ടുത്തരവാദിത്വത്തെക്കുറിച്ചും ഇരുനേതാക്കളും തമ്മിലുണ്ടായ അഭിപ്രായവ്യത്യാസങ്ങള്‍ വലിയ രാഷ്ട്രീയ ചര്‍ച്ചയായിരുന്നു. ഈ സാഹചര്യം കൂടുതല്‍ വഷളാകുന്നത് സര്‍ക്കാരിന്‍റെയും മുന്നണിയുടെയും പ്രതിച്ഛായയെ ബാധിക്കുമെന്ന വിലയിരുത്തലിലാണ് എഐസിസി അടിയന്തരമായി ഇടപെട്ടത്.
പുതിയ കെപിസിസി അധ്യക്ഷനെ ഔദ്യോഗികമായി പ്രഖ്യാപിക്കുന്നതുവരെ പാര്‍ട്ടിക്കുള്ളില്‍ സമ്പൂര്‍ണമായ വെടിനിര്‍ത്തല്‍ പാലിക്കണമെന്നാണ് ഹൈക്കമാന്‍ഡ് മുന്നോട്ടുവയ്ക്കുന്ന പ്രധാന നിര്‍ദേശം. നേതാക്കളുടെ പരസ്യ പ്രസ്താവനകള്‍ പ്രതിപക്ഷത്തിന് ആയുധമാകുമെന്നും കേന്ദ്ര നേതൃത്വം മുന്നറിയിപ്പ് നല്‍കിയിട്ടുണ്ട്.
കേരളത്തിലെ കോണ്‍ഗ്രസ് നേതാക്കള്‍ക്കിടയിലെ അതൃപ്തി പരിഹരിക്കാന്‍ രാഹുല്‍ ഗാന്ധി തന്നെ നേരിട്ട് ഇടപെട്ടേക്കുമെന്നാണ് ഡല്‍ഹിയില്‍ നിന്നുള്ള റിപ്പോര്‍ട്ടുകള്‍ വ്യക്തമാക്കുന്നത്. ഉന്നത നേതാക്കള്‍ തമ്മിലുള്ള അഭിപ്രായവ്യത്യാസങ്ങള്‍ താഴെത്തട്ടിലുള്ള പ്രവര്‍ത്തകരുടെ ആത്മവിശ്വാസത്തെ ബാധിക്കാതിരിക്കാനുള്ള തീവ്രശ്രമത്തിലാണ് കോണ്‍ഗ്രസ് നേതൃത്വം.
രാഹുല്‍ ഗാന്ധിയുടെ ഇടപെടലിലൂടെയും പുതിയ അധ്യക്ഷന്‍റെ വരവോടെയും കേരളത്തിലെ കോണ്‍ഗ്രസില്‍ പുതിയൊരു അധികാര സന്തുലിതാവസ്ഥ രൂപപ്പെടുമെന്നാണ് പ്രതീക്ഷിക്കുന്നത്. അതുവരെ പാര്‍ട്ടിക്കുള്ളിലെ ഈ ശീതസമരം പുറത്തേക്ക് വരാതെ പിടിച്ചുനിര്‍ത്തുക എന്നതാണ് ഹൈക്കമാന്‍ഡിന് മുന്നിലുള്ള ഏറ്റവും വലിയ വെല്ലുവിളി.
ഇപ്പോഴത്തേത് ചായക്കോപ്പയിലെ കൊടുങ്കാറ്റുമാത്രമെന്ന് കെ.സി. വേണുഗോപാല്‍
കണ്ണൂര്‍: യുഡിഎഫില്‍ അഭിപ്രായഭിന്നതകള്‍ രൂക്ഷമാണെന്ന വാര്‍ത്തകള്‍ തെറ്റാണെന്ന് എഐസി സി ജനറല്‍ സെക്രട്ടറി കെ.സി. വേണുഗോപാല്‍ എംപി. കണ്ണൂരിൽ മാധ്യമങ്ങളോടു സംസാരിക്കുകയായിരുന്നു അദ്ദേഹം.
വൈദ്യുതി വകുപ്പുമായി ബന്ധപ്പെട്ട വിവാദങ്ങള്‍ ഉള്‍പ്പടെയുള്ള വിഷയങ്ങള്‍ മുഖ്യമന്ത്രി വി.ഡി. സതീശനും മന്ത്രി സണ്ണി ജോസഫും ചേര്‍ന്ന് ഉടന്‍ പരിഹരിക്കുമെന്ന് അദ്ദേഹം പറഞ്ഞു. ഇടപെടേണ്ട സാഹചര്യം ഉണ്ടെങ്കില്‍ മാത്രം കേന്ദ്രനേതൃത്വം ഇടപെടും. ഇപ്പോള്‍ ശ്രദ്ധ ദേശീയ പ്രശ്‌നങ്ങളില്‍ മാത്രമാണ്.
വൈദ്യുതി മന്ത്രിയും മുഖ്യമന്ത്രിയും പ്രാഗത്‌ഭ്യം ഉള്ളവരാണ്. ഇപ്പോള്‍ നടക്കുന്നത് ചായക്കോപ്പയിലെ കൊടുങ്കാറ്റാണ്. പരസ്യമായ വിമര്‍ശനത്തിനു പരസ്യമായ പ്രതികരണത്തിനില്ല. അതും അച്ചടക്ക ലംഘനമാണ്.- കെ.സി. വേണുഗോപാല്‍ പറഞ്ഞു.
