കോട്ടയം: കെവിൻ വധക്കേസ് ദുരഭിമാനക്കൊലയെന്ന് കോട്ടയം സെഷൻസ് കോടതി. പ്രധാനപ്രതിയായ ഷാനു ചാക്കോയടക്കം 10 പ്രതികൾ കുറ്റക്കാരാണെന്ന് കോടതി കണ്ടെത്തി. കെവിന്‍റെ ഭാര്യയായ നീനുവിന്‍റെ സഹോദരനാണ് ഷാനു. കേസിൽ ഒന്ന് മുതൽ 12 വരെയുള്ള 10 പ്രതികളെയാണ് കുറ്റക്കാരാണെന്ന് കണ്ടെത്തിയത്. ഷാനു ചാക്കോയടക്കം കേസിൽ 14 പ്രതികളാണ് ഉണ്ടായിരുന്നത്.
നീനുവിന്‍റെ പിതാവ് ചാക്കോ ജോൺ ഉൾപ്പെടെ നാല് പ്രതികളെ കോടതി വെറുതെവിട്ടു. ചാക്കോ ജോൺ ഗൂഡാലോചന നടത്തിയതെന്ന ആരോപണം തെളിയിക്കാൻ പ്രോസിക്യൂഷന് കഴിഞ്ഞില്ല. കേസിൽ അഞ്ചാം പ്രതിയാണ് ചാക്കോ ജോൺ. കുറ്റകൃത്യത്തിൽ ചാക്കോ ജോൺ നേരിട്ട് ഇടപെട്ടിരുന്നില്ല.
പ്രതികൾ 364 എ, 302 വകുപ്പുകൾ പ്രകാരം കുറ്റക്കാരാണെന്നാണ് കോടതി കണ്ടെത്തിയത്. ഇതു പ്രകാരം പ്രതികൾക്ക് പരമാവധി ശിക്ഷയായ തൂക്കുകയർവരെ ലഭിക്കാം. കേസിൽ ശിക്ഷാവിധി ശനിയാഴ്ചത്തേക്ക് മാറ്റി.
