കൂത്തുപറമ്പ്: യാത്രയ്ക്കിടെ റോഡിൽ നിന്നും കളഞ്ഞുകിട്ടിയ പണവും രേഖകളുമടങ്ങിയ പേഴ്സ് പോലീസ് ഉദ്യോഗസ്ഥൻ പോലീസ് സ്റ്റേഷനിൽ ഏല്പിച്ചതിനെ തുടർന്ന് ഉടമസ്ഥനെ കണ്ടെത്താനായി. ഇരിക്കൂർ പോലീസ് സ്റ്റേഷനിലെ സീനിയർ സിവിൽ പോലീസ് ഓഫീസറും മട്ടന്നൂർ കട്ടൻകവർ സ്വദേശിയുമായ പി.കെ. അക്ബറിനാണ് കഴിഞ്ഞ ദിവസം മട്ടന്നൂരിൽ നിന്നും കൂത്തുപറമ്പിലേക്കുള്ള ബൈക്ക് യാത്രയ്ക്കിടെ മൂന്നാംപീടികയിൽ നിന്നും എടിഎം കാർഡുകൾ, ഐഡികാർഡ്, ലൈസൻസ്,ആധാർകാർഡ്, പണം എന്നിവ അടങ്ങിയ പേഴ്സ് വീണു കിട്ടിയത്.
പേഴ്സ് കൂത്തുപറമ്പ് പോലീസ് സ്റ്റേഷനിൽ ഏല്പിച്ചതിനെ തുടർന്നാണ് ഉടമസ്ഥനെ കണ്ടെത്താനായത്. നീർവേലിയിലെ റഹ്‌നാസ് കഴിഞ്ഞദിവസം സ്റ്റേഷനിലെത്തി പേഴ്സ് ഏറ്റുവാങ്ങി.
