കാസര്ഗോഡ്: യുവാക്കളുടെ മാനസികാരോഗ്യം സംബന്ധിച്ച ബോധവത്കരണവുമായി ബിയോണ്ഡ് ദ് ഹൊറൈസണ് എ റൈഡ് ഫോര് റെസിലിയന്സ് എന്ന കാമ്പയിന് നാളെ മുതല് 18 വരെ കേരളത്തില് പര്യടനം നടത്തും. മാനസികാരോഗ്യപ്രവര്ത്തകയും മോട്ടിവേഷണല് സ്പീക്കറും ഫാഷന് സ്റ്റൈലിസ്റ്റുമായ സെഹര് ഹാഷ്മിയും സമാനമനസ്കരായ യുവാക്കളും ഈ ദൗത്യവുമായി എന്ഫീല്ഡ് ബുള്ളറ്റില് രാജ്യമാകെ ചുറ്റിസഞ്ചരിക്കുകയാണ്.
വടക്കേഇന്ത്യന് പര്യടനം കഴിഞ്ഞവര്ഷം പൂര്ത്തിയാക്കിയ ദൗത്യസംഘം ഇപ്പോള് ദക്ഷിണേന്ത്യന് പര്യടനത്തിലാണ്. ഇവര് നാളെ മുതല് 18 വരെ സംസ്ഥാനത്ത് ഒന്പതു ജില്ലകളില് 18 കേന്ദ്രങ്ങളില് സംഘം യുവാക്കളോടു സംവദിക്കും. കാസര്ഗോഡ് നാളെ, കണ്ണൂര് 10, 11ന്, കോഴിക്കോട് 12ന്, മലപ്പുറം13ന്, തൃശൂര് 14ന്, എറണാകുളം 15ന്, ആലപ്പുഴ 16ന്, കൊല്ലം 17ന്, തിരുവനന്തപുരം 18ന് എന്നിങ്ങനെയാണു ജില്ലകളില് പരിപാടി. സെപ്റ്റംബര് 18നു വൈകുന്നേരം കന്യാകുമാരിക്കു പോകും.
കേരള ശാസ്ത്രസാഹിത്യ പരിഷത്ത് യുവസമിതിയാണ് സംസ്ഥാനത്ത് ഈ ഉദ്യമത്തെ പിന്തുണയ്ക്കുന്നതും വേദികള് ഒരുക്കുന്നതും. തെരുവില് നാടകാവതരണത്തിനിടെ രാഷ്ട്രീയഗുണ്ടകള് ഇരുമ്പുവടികൊണ്ട് ആക്രമിച്ചു കൊലപ്പെടുത്തിയ സഫ്ദര് ഹാഷ്മിയുടെ അനന്തരവളാണു സെഹര് ഹാഷ്മി. സഫ്ദറിന്റെ സഹോദരിയും സാമൂഹികപ്രവര്ത്തകയുമായ ശബ്നം ഹാഷ്മിയുടെയും ശാസ്ത്രജ്ഞനും എഴുത്തുകാരനുമായ ഡോ. ഗോഹര് റാസയുടെയും വളര്ത്തുമകള്.
കടുത്ത വിഷാദരോഗത്തിന്റെയും ബോര്ഡര്ലൈന് പേഴ്സണാലിറ്റി ഡിസോര്ഡറിന്റെയും പിടിയില് അമര്ന്ന് പലതവണ ആത്മഹത്യയ്ക്കും സ്വയംപീഡനങ്ങള്ക്കും മുതിര്ന്ന അനുഭവമുള്ള സെഹര് സ്വന്തം അതിജീവനകഥയുമായാണ് ഇന്ത്യന് യുവതയെ അഭിസംബോധന ചെയ്യുന്നത്.
സെഹര് ട്രസ്റ്റിയായി സ്ത്രീവിദ്യാഭ്യാസത്തിനായി പ്രവര്ത്തിക്കുന്ന, കാമ്പയിന് പെഹ്ചാന് എന്ന സംഘടനയുടെ ആഭിമുഖ്യത്തിലാണ് ബിയോണ്ഡ് ദി ഹൊറൈസണ് കാമ്പയിന് സംഘടിപ്പിക്കുന്നത്. ഓഗസ്റ്റ് 20ന് ന്യൂഡല്ഹിയിലെ കോണ്സ്റ്റിറ്റ്യൂഷന് ക്ലബ് ഓഫ് ഇന്ത്യയില് പ്രശസ്ത സിനിമാതാരം ഷര്മിള ടാഗോറാണ് ഈ യാത്ര ഫ്ലാഗ് ഓഫ് ചെയ്തത്. ഇക്കുറി 7,000ല്പരം കിലോമീറ്റര് 55 ദിവസംകൊണ്ട് താണ്ടും.
