തിരുവനന്തപുരം: സിപിഎം വനിതാ നേതാവിന്‍റെ മകനെ സംസ്കൃത കോളജിനകത്ത് വച്ച് എസ്എഫ്ഐ സംഘം മർദിച്ച കേസിൽ പ്രതികൾ ഒളിവിൽ. പ്രതികളെ പിടികൂടാനായി അന്വേഷണം ആരംഭിച്ചതായി പോലീസ് വ്യക്തമാക്കി.
പെരുങ്കടവിള പഞ്ചായത്ത് വൈസ് പ്രസിഡന്‍റും സിപിഎം നേതാവുമായ ബിന്ദുവിന്‍റെ മകൻ ആദർശിനാണ് മർദനമേറ്റത്. ആദർശ് സംസ്കൃത കോളജിലെ ഒന്നാം വർഷ ബിരുദവിദ്യാർത്ഥിയാണ്.
ആദർശിനെ ആക്രമിച്ച സംഭവത്തിൽ എസ്എഫ്ഐ ഭാരവാഹികളായ ജിത്തു, സച്ചിൻ, നസിം എന്നിവർ ഉൾപ്പെടെ ഏഴ് പേർക്കെതിരെയാണ് കന്‍റോണ്‍മെന്‍റ് പോലീസ് കേസെടുത്തത്.
ഇതിൽ നസിം യൂണിവേഴ്സിറ്റി കോളജിലെ എസ്എഫ്ഐ പ്രവർത്തകനെ കുത്തിക്കൊലപ്പെടുത്താൻ ശ്രമിച്ചെന്ന കേസിലെ പ്രതിയാണ്.
ആദർശിന്‍റെ മൊഴിയുടെ അടിസ്ഥാനത്തിലാണ് കന്‍റോണ്‍മെന്‍റ് പോലീസ് കേസെടുത്തത്. കഴിഞ്ഞ മാസം 24 ന് കോളജിൽ സംഘടിപ്പിച്ച ഓണാഘോഷ പരിപാടിയിൽ ചാക്കിൽ കയറിയുള്ള ഓട്ടമത്സരത്തിൽ പങ്കെടുക്കാൻ ആദർശ് വിസമ്മതിച്ചിരുന്നു.
മുണ്ട് ഉടുത്തിരുന്നതിനാൽ സാധിക്കില്ലെന്ന് പറഞ്ഞു. ഇതിലുള്ള വിരോധത്തിൽ ആദർശിനെ ക്ലാസ് മുറിയിലേക്ക് ബലമായി പിടിച്ചു കൊണ്ട് പോയി മുഖത്തും കൈകളിലും മുതുകിലും ക്രൂരമായി പ്രതികൾ മർദ്ദിച്ചു. ഇതേ തുടർന്ന് മകനെയും കൂട്ടി മാതാവ് ബിന്ദു കന്‍റോണ്‍മെന്‍റ് പോലീസിൽ പരാതി നൽകുകയായിരുന്നു.
