ഓസീസ് സൂപ്പര്‍താരം ക്രിസ് ലിന്നിന്റെ തലയിലെ പുകയാണ് ഇപ്പോള്‍ ക്രിക്കറ്റ് ലോകത്തെ സംസാര വിഷയം. പാക്കിസ്ഥാന്‍ സൂപ്പര്‍ലീഗ് മത്സരത്തിനിടെയാണ് ലിന്നിന്റെ തല പുകഞ്ഞത്. സംഭവത്തിന്റെ വീഡിയോ സാമൂഹികമാധ്യമങ്ങളില്‍ കത്തിപ്പടരുകയാണ്.ലാഹോര്‍ ക്വാലാന്‍ഡേഴ്‌സും പെഷവാര്‍ സല്‍മിയും തമ്മിലുള്ള മത്സരത്തിനിടെയായിരുന്നു സംഭവം.
ശനിയാഴ്ച നടന്ന മത്സരം മഴ കാരണം 12 ഓവറായി നടത്താനാണു തീരുമാനിച്ചിരുന്നത്. തുടര്‍ന്ന് ക്വാലാന്‍ഡേഴ്‌സ് ടീം ഫീല്‍ഡ് ചെയ്യുന്നതിനിടെയായിരുന്നു ക്രിസ് ലിന്നിന്റെ തലയില്‍നിന്നു പുക ഉയരുന്നതായി ശ്രദ്ധയില്‍പെട്ടത്.
അധികം വൈകാതെ ഇതിന്റെ വിഡിയോ ദൃശ്യങ്ങളും വൈറലായി. ഈ സമയത്തു ടീമിന്റെ മോശം പ്രകടനത്തില്‍ ലിന്‍ അസ്വസ്ഥനായിരുന്നത് അദ്ദേഹത്തിന്റെ മുഖത്തുനിന്നും വ്യക്തമാണെന്നും ആരാധകര്‍ അവകാശപ്പെടുന്നു.
പിഎസ്എല്ലില്‍ ലാഹോര്‍ ക്വാലാന്‍ഡേഴ്‌സിന്റെ താരമാണ് ക്രിസ് ലിന്‍. ടോസ് നഷ്ടപ്പെട്ട് ആദ്യം ബാറ്റു ചെയ്ത പെഷവാര്‍ സല്‍മി ഏഴു വിക്കറ്റ് നഷ്ടത്തില്‍ 132 റണ്‍സ് നേടി.
എന്നാല്‍ 133 റണ്‍സ് വിജയലക്ഷ്യം പിന്തുടര്‍ന്ന ക്വാലാന്‍ഡേഴ്‌സിന് 12 ഓവറില്‍ ആറു വിക്കറ്റ് നഷ്ടത്തില്‍ 116 റണ്‍സ് മാത്രമാണു സ്വന്തമാക്കാന്‍ കഴിഞ്ഞത്. ലിന്‍ 15 പന്തില്‍ 30 റണ്‍സ് നേടിയെങ്കിലും ടീം തോറ്റു. എന്തായാലും ഈ അദ്ഭുത പ്രതിഭാസത്തിന്റെ കാരണം ആലോചിച്ച് തല പുകയ്ക്കുകയാണ് ക്രിക്കറ്റ് ആരാധകര്‍.
