മാർക്കറ്റിംഗ് തന്ത്രങ്ങൾ കൈവിട്ടുപോയെന്ന തോന്നലാണോ നിങ്ങൾക്ക്, എന്നാൽ അതു തെളിയിക്കുന്ന പുതിയ പോസ്റ്റുമായി യുവാവ് രംഗത്ത്. ആളുകളുടെ ശ്രദ്ധ പിടിച്ചപറ്റാൻ മാർക്കറ്റിംഗ് തന്ത്രങ്ങൾ എത്രത്തോളം തരംതാഴാം എന്നതിലേക്ക് വിരൽചൂണ്ടുന്ന ഒരു ടെക് സ്ഥാപകന്റെ സോഷ്യൽ മീഡിയ പോസ്റ്റ് വലിയ ചർച്ചയായിരിക്കുകയാണ്.
ഒരു ഉത്പന്നം പ്രമോട്ട് ചെയ്യുന്നതിനായി ആളുകളെ ഞെട്ടിക്കുന്ന രീതിയിലുള്ള ഇമെയിൽ അയക്കുന്നത് ധാർമികമായ അതിർവരമ്പുകൾ ലംഘിക്കുന്നുണ്ടോ എന്ന ആശങ്കയാണ് ഈ പോസ്റ്റ് ഉയർത്തുന്നത്. താൻ ഇന്നുവരെ കണ്ടിട്ടുള്ളതിൽ വച്ച് ഏറ്റവും മോശം, കോൾഡ് ഇമെയിൽ ഇതാണെന്ന് പറഞ്ഞുകൊണ്ട്, അദ്ദേഹം അതിന്റെ സ്ക്രീൻഷോട്ട് സഹിതമാണ് പോസ്റ്റ് പങ്കുവെച്ചത്.
“നിങ്ങളുടെ കുടുംബം മരിക്കാൻ പോകുന്നു’ എന്ന തലക്കെട്ടോടെയാണ് ഇമെയിൽ വന്നത്. എന്നാൽ ഇമെയിൽ തുറന്നു നോക്കിയപ്പോൾ അതൊരു സെയിൽസ് സന്ദേശമായിരുന്നു. അവരുടെ പ്രത്യേക ഓഫർ ഉപയോഗപ്പെടുത്തിയില്ലെങ്കിൽ സ്വീകർത്താവിന്റെ കുടുംബം “നാണക്കേട് കൊണ്ട് മരിക്കും” എന്നായിരുന്നു അതിൽ എഴുതിയിരുന്നത്. അതോടൊപ്പം, തങ്ങളുടെ എഐ ടൂൾ പുതിയതായി ഉപയോഗിക്കുന്നവർക്ക് പരിമിത കാലത്തേക്ക് 50 ശതമാനം ഡിസ്കൗണ്ട് നൽകുന്നുണ്ടെന്നും കമ്പനി ഇമെയിലിൽ വ്യക്തമാക്കിയിരുന്നു.
ഈ പോസ്റ്റ് സമൂഹമാധ്യമങ്ങളിൽ പങ്കുവച്ചതിനുപിന്നാലെ വിമർശനങ്ങൾ ഉയരുകയും ഓട്ടോമേറ്റഡ് സെയിൽസ് രീതികളുടെ ധാർമ്മികതയെക്കുറിച്ച് ഇന്റർനെറ്റിൽ വലിയ ചർച്ചകൾക്ക് വഴിവെക്കുകയും ചെയ്തു. ഇത് ഇപ്പോൾ കൈവിട്ടുപോയിരിക്കുകയാണ്, ഇത് ശരിക്കും ഒരു ഭ്രാന്തമായ രീതിയാണ്, അവരെ റിപ്പോർട്ട് ചെയ്യൂ, തുടങ്ങിയ നിരവധി കമന്റുകളാണ് പോസ്റ്റിനു താഴെ പ്രത്യക്ഷപ്പെട്ടിരിക്കുന്നത്.
