ഇരിങ്ങാലക്കുട: നിലവും തണ്ണീര്‍ത്തടങ്ങളും നികത്തി ഇരിങ്ങാലക്കുട മണ്ഡലത്തില്‍ കഴിഞ്ഞ സര്‍ക്കാര്‍ കൊണ്ടുവരാനിരുന്ന 600 ഏക്കറിലെ പദ്ധതി നടപ്പാക്കില്ലെന്ന് കൃഷി മന്ത്രി വി.എസ്. സുനില്‍കുമാര്‍. കാറളം സര്‍വീസ് സഹകരണ ബാങ്കിന്റെ സപ്തദിന ഞാറ്റുവേല ചന്ത ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ഈ സ്ഥലം വാങ്ങിയ വന്‍കിടക്കാര്‍ കൃഷി ഇറക്കാനോ, കര്‍ഷകര്‍ക്ക്് പാട്ടത്തിന് നല്‍കാനോ തയാറാകണമെന്ന് മന്ത്രി ആവശ്യപ്പെട്ടു.
മെത്രാന്‍ കായലില്‍ ഈ സര്‍ക്കാര്‍ കൃഷിക്കാരെ ഉപയോഗിച്ച് കൃഷി ഇറക്കുമെന്നും ഇതിനായി 80 ലക്ഷം രൂപ അനുവദിച്ചിട്ടുണ്ടെന്നും മന്ത്രി പറഞ്ഞു. പ്രഫ.കെ.യു. അരുണന്‍ എംഎല്‍എ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്റ് ഷീല വിജയകുമാര്‍, ഇരിങ്ങാലക്കുട ബ്ലോക്ക് പഞ്ചായത്ത് പ്രസിഡന്റ് വി.എ. മനോജ് കുമാര്‍, ജില്ലാ പഞ്ചായത്തംഗം എം.കെ. ഉദയപ്രകാശ്, കാറളം പഞ്ചായത്ത് പ്രസിഡന്റ് കെ.എസ്. ബാബു, കാട്ടൂര്‍ പഞ്ചായത്ത് പ്രസിഡന്റ് മനോജ് വലിയപറമ്പില്‍, കാറളം സര്‍വീസ് സഹകരണ ബാങ്ക് പ്രസിഡന്റ് വി.എ ഭാസ്ക്കരന്‍ തുടങ്ങിയവര്‍ പ്രസംഗിച്ചു.
