കൊച്ചി: ഫുട്ബോൾ താരം ലയണൽ മെസ്സിയെയും അർജന്‍റീന ടീമിനെയും കേരളത്തിൽ എത്തിക്കാമെന്ന പേരിൽ നടത്തിയ തട്ടിപ്പിൽ എൻഫോഴ്‌സ്‌മെന്റ് ഡയറക്ടറേറ്റ് കള്ളപ്പണം വെളുപ്പിക്കൽ നിരോധന നിയമപ്രകാരം (PMLA) ഇഡിയുടെ കൊച്ചി യൂണിറ്റ് കേസെടുത്തു.
കേസിലെ ഒന്നാം പ്രതിയായ ആന്‍റോ അഗസ്റ്റിനെതിരെയും രണ്ടാം പ്രതിയായ റിപ്പോർട്ടർ ബ്രോഡ്കാസ്റ്റിംഗ് കമ്പനിക്കെതിരെയുമാണ് കേസ് . വിദേശത്തേക്ക് അയച്ച കോടികളുടെ ഉറവിടം, പണത്തിന്‍റെ വഴി, ഇതിന് പിന്നിലെ യഥാർത്ഥ ഗുണഭോക്താക്കൾ എന്നിവരെ കേന്ദ്രീകരിച്ചാവും ഇഡി അന്വേഷണം.
കളമശ്ശേരി പോലീസ് രജിസ്റ്റർ ചെയ്ത വഞ്ചനാക്കുറ്റത്തിനുള്ള എഫ്.ഐ.ആറിന്‍റെ അടിസ്ഥാനത്തിലാണ് ഇഡിയുടെ പുതിയ ക്രിമിനൽ കേസ്. സംസ്ഥാന സർക്കാർ രൂപീകരിച്ച എസ്ഐടിയുടെ പ്രാഥമിക കണ്ടെത്തലുകളുടെ അടിസ്ഥാനത്തിലുള്ളതാണ് വഞ്ചനാക്കുറ്റത്തിനുള്ള എഫ്.ഐ.ആർ.
അർജന്‍റീന ഫുട്ബോൾ അസോസിയേഷനുമായി ഉണ്ടാക്കിയതായി പറയപ്പെടുന്ന കരാറിൽ വ്യാജ വിവരങ്ങൾ ഉൾപ്പെടുത്തി സർക്കാരിനെയും പൊതുജനങ്ങളെയും വഞ്ചിച്ചുവെന്നാണ് കണ്ടെത്തൽ.
റിസർവ് ബാങ്ക് ചട്ടങ്ങൾ മറികടന്ന് കൃത്യമായ വാണിജ്യ രേഖകളില്ലാതെ ആർ.ബി.സി കമ്പനി 126 കോടി രൂപയോളം വിദേശത്തേക്ക് അയച്ചിരുന്നു. മെസ്സിയെയും അർജന്‍റീന ടീമിനെയും കേരളത്തിൽ എത്തിക്കാമെന്ന പേരിൽ നടത്തിയ ഈ വിദേശ ഇടപാടുകളിൽ ഇഡി ഫെമ പ്രകാരം നേരത്തെ എടുത്ത കേസും നിലവിലുണ്ട്. ഈ ഇടപാടുകളിലൂടെ 25.78 കോടി യിൽപരം രൂപയുടെ ജി.എസ്.ടി വെട്ടിപ്പ് നടത്തിയതായുള്ള കണ്ടെത്തലിൽ ജി.എസ്.ടി ഇന്‍റെലിജൻസ് വിഭാഗവും നടത്തുന്ന അന്വേഷണവും പുരോഗമിക്കുകയാണ്.
ഉയർന്ന രാഷ്ട്രീയ സമ്മർദ്ദം മൂലമാണ് നടപടികൾ വൈകുന്നതെന്ന നിർണായക മൊഴിയും പുറത്തു വന്നിട്ടുണ്ട്. അന്വേഷണമിപ്പോൾ ഉദ്യോഗസ്ഥരിലേക്കും നീളുകയാണ്. സ്വകാര്യ കമ്പനിയെ സഹായിക്കാനും നികുതി പിരിവ് വൈകിപ്പിക്കാനും ശ്രമിച്ച രണ്ട് ജി.എസ്.ടി ഉദ്യോഗസ്ഥരെ കഴിഞ്ഞ ദിവസങ്ങളിൽ സ്ഥലം മാറ്റിയിരുന്നു.
